Kryesues i Bordit të ShSKUK-së zgjidhet Naim Bardiqi

Ministri i Shëndetësisë, Arben Vitia të mërkurën është takuar me bordin e ri të Shërbimit Spitalor Klinik Universitar të Kosovës (SHSKUK), me të cilët ka diskutuar për angazhimet e përbashkëta që duhet të kenë institucionet.

Vitia ka falënderuar bordin e kaluar për angazhimin që kanë bërë gjatë periudhës së COVID-19 të cilën e ka quajtur “sfidë të jashtëzakonshme”.

Lajmi është bërë i ditur përmes një komunikate dërguar mediave.

“Në fillim të punës kishim situatën me pandeminë COVID-19 që ishte një sfidë e jashtëzakonshme për sistemin shëndetësor. Duke falënderuar bordin e kaluar arritëm që me shumë punë, angazhim dhe përkushtim, t’ia dalim bashkërisht”.

Gjithashtu, bordi i ri i ShSKUK-së mbajti edhe mbledhjen e parë dhe me votë unanime zgjodhën si kryesues të bordit të ri të ShSKUK-së, përfaqësuesin e Ministrisë së Shëndetësisë, Naim Bardiqi.

Ministri është shprehur i lumtur me punën e bordit të deritanishëm.

“Këta individë të jashtëzakonshëm, profesionistë shembull kanë dhënë kontribut kyç gjatë kësaj kohe dhe standardi i cili është ngritur besojmë që do të jetë ndihmesë edhe për bordin aktual për rrugën të cilën e kemi përpara”, tha me ketë rast Vitia.

Ministri i Shëndetësisë, Arben Vitia më 26 prill në mbledhjen Qeverisë së Kosovës ka emëruar bordin e ri të Shërbimit Spitalor Klinik Universitar të Kosovës (SHSKUK), pas një muaji mungesë të këtij bordi.

Bordit të Shërbimit Spitalor Klinik dhe Universitar i kishte skaduar mandati më datë 27 mars 2023.

Bordi i cili është emëruar më datën 27.03.2020, e të cilit i kishte skaduar mandati, ka qenë me këtë përbërje: Aida Rexhepi, Agreta Gecaj-Gashi, Vjollca Kodolli, Xhevat Jakupi, Enver Gashi dhe një përfaqësues i MSH-së.

Opozita vazhdimisht e kishte kritikuar ministrin e Shëndetësisë, Arben Vitia për mosemërimin e bordit të ri të SHSKUK-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.