“Istraga” ka publikuar një listë me emrat e kriminelëve të luftës, që kanë implikime me gjenocidin e Srebrenicës dhe që kanë gjetur “shtëpinë” e tyre ku enden të lirë, e të pashqetësuar.
Këta të fundit edhe pse të shpallur nga gjykatat boshnjake – në listën e kuqe të Interpolit – për krime lufte, lëvizin të lirë në Serbi.
Mediumi boshnjak “Istraga” është një hapësirë investigative e themeluar në vitin 2019, e cila ka bërë disa nga zbulimet më të mëdha gazetareske në Bosnje. Ndër to, merr hov skandali i përgjimeve të Kryeprokurorit të Shtetit, i cili pas raportimit, u detyrua të jepte dorëheqjen.
Ajo liston në artikullin e saj dhjetë të dënuar, që sipas mediumit, jetojnë dhe punojnë lirisht në Serbi prej kohësh.
“Disa prej tyre janë akuzuar për gjenocid, të tjerët janë formalisht nën hetim dhe ka nga ata që janë dënuar për krime të tjera kundër njerëzimit”, shkruan Istraga.
Milomir Savçiç
I pari në listë dhe i fundit që u largua nga Bosnje dhe Hercegovina (BiH) është presidenti i Organizatës së Veteranëve të Republika Srpska (RS), Milomir Savçiç – një ish-komandant lufte.
Gjykata e BiH-ut konfirmoi aktakuzën që rëndonte mbi ish-komandantin Savçiç, më 13 janar të vitit 2020.
Aktakuza pretendon, ndër të tjera, se Milomir Savçiç, në cilësinë e komandantit të Regjimentit të 65 të Ushtrisë së RS-së, i njohur me qëllimet shfarosëse prapa sulmit etnik dhe fetar boshnjak, ndihmoi dhe mbështeti në vrasjen e tyre.
Savçiç asokohe shkeli masat e ndalimit, që caktoi Zyra e Prokurorit, duke bërë që Gjykata të urdhëronte ndalimin e tij.
Tepër vonë. Milomir Savçiç u arratis dhe që prej asaj kohe çdo gjurmë e tij ka humbur.
Ljuban Egim
Gjykata e BiH-ut lëshoi një urdhër të kuq të Interpolit edhe për Ljuban Egim.
Mbi të kishte dyshime të bazuara për krime kundër njerëzimit në Kotor Varosh, akuzë e ngritur më vonë nga Zyra e Prokurorit.
Ljuban Egim, pavarësisht urdhrit të kuq, ende jeton i lirë në Beograd.
Deri në korrik 2019, i arratisuri nga drejtësia boshnjake, jetonte në qendër të Beogradit.
Mirko Todoroviç “Banana”
Mirko Todoroviç “Banana” u arratis nga BiH-u, ku Gjykata e Bosnje dhe Hercegovinës e dënoi me 13 vjet burg për krime lufte në Bratunac.
Në aktgjykimin e Gjykatës së BiH-ut thuhet se Milosh Radiç dhe Mirko Todoroviç “Banana” ishin bashkëfajtorë për vrasjen e shtatë personave më 20 maj të vitit 1992.
Radiç dhe Todoroviç u dënuan me 17 vjet burg secili në aktgjykimin e shkallës së parë.
Më vonë, dënimi i Todoroviç u lehtësua në 13 vjet, dhe i Radiçit në 12.
Para se të dërgohej në burg për të vuajtur dënimin, Todoroviç iku në Serbi. Ai nuk u arrestua kurrë.
Milorad Misha Pelemis
Milorad Misha Pelemis, komandant i Detashmentit të Dhjetë të Sabotazhit, anëtarët e të cilit do të pushkatonin të paktën 1 mijë e 200 boshnjakë të Srebrenicës më 16 korrik 1995.
Skuadra e pushkatimit drejtohej nga slloveni Franz Kos, i cili u dënua me 35 vite burg. Komandanti i kësaj njësie, Milorad Misha Pelemis, iku në Serbi dhe nuk u ndoq asnjëherë.
Drejtësia boshnjake u vu në ndjekje të tij duke lëshuar një urdhër të kuq të Interpol-it, por më kot.
“Në vend të sallave të gjyqit dhe qelive, Pelemis qëndroi në studiot televizive serbe”, ravijëzon Istraga.
Ai vdiq më 23 prill të këtij viti, dhe epitafi i mediave serbe për Pelemis ishte – “komandanti i famshëm ndërroi jetë”.
Novak Gjukiç
“Kanë kaluar gati shtatë vjet qëkurse Serbia u bë shtëpia e kriminelit të luftës Novak Gjukiç”, shton Istraga.
Ai u shpall fajtor nga gjykata boshnjake për urdhërimin e togës që të bombardonte Tuzlën më 25 maj të vitit 1995.
Gjukiç ishte komandant i Grupit Taktik Ozren, që vranë 70 persona në masakrën e Kapisë.
Në shkurt të vitit 2014, pas një vendimi të Gjykatës Kushtetuese të BiH-ut, vendimi i tij u rrëzua për shkak të zbatimit të gabuar të ligjit. Sidoqoftë, në qershor të të njëjtit vit, Gjukiç u dënua përsëri, me 20 vjet burg.
Megjithatë, ai u zhvendos në Serbi “për trajtim”.
Tomislav Kovaç
Pasi u konfirmua aktakuza më 18 janar të vitit 2018, u lëshua një urdhër i kuq i Interpolit nga gjykata boshnjake për Kovaçin.
Autoritetet serbe nuk e arrestuan kurrë dhe ai tani jeton dhe punon i lirë në Beograd, dhe është një “i ftuar” i shpeshtë në emisionet televizive serbe.
Aktakuza – akuzon Tomislav Kovaç për operacionin e kapjes, burgosjes, ekzekutimit të burrave dhe të rinjve boshnjakë më 1 nëntor të vitit 1995.
Asokohe, Kovaç mbante pozitën e Komandantit të Shtabit të Forcave Policore në Republikën Srpska.
Drago Samarxhija
Para se të ndërronte jetë më 16 shkurt 2021, Drago Samarxhija, i akuzuar për krime lufte jetonte gjithashtu i lirë në Serbi.
Samarxhija u akuzua për krime kundër njerëzimit në Komunën Kljuç. Ai u akuzua për pjesëmarrje në sulmet mbi fshatrat dhe zonat e pambrojtura të banuara nga myslimanët boshnjakë.
Aktakuza e tij, thekson se përpos civilëve që mbetën të vrarë nga sulmet, disa nga të mbijetuarit u abuzuan psikologjikisht dhe fizikisht prej trupave të RS-së.
Dushko Kornjaça
Në shtator të vitit të kaluar, Dushko Kornjaça, i paditur për krime kundër njerëzimit në Çajniçe, gjeti “lirinë” e tij në Serbi.
Në faqen e internetit të Gjykatës së Bosnjës dhe Hercegovinës shkruhet se “Dusko Kornjaça është i paarritshëm nga autoritetet gjyqësore”.
Aktakuza kundër Dusko Kornjaça u konfirmua nga Gjykata e BiH-ut më 8 qershor të vitit 2015.
Asokohe, Kornjaça ishte i emëruar president i Shtabit të Krizave, e më vonë u caktua komandant i selisë së luftës të komunës serbe të Çajniçes.
Kornjaça planifikoi dhe urdhëroi persekutimin e popullsisë jo-serbe në komunën e Çajniçes.
“Edhe pse për të është lëshuar një urdhër i kuq i Interpolit, ky i paditur për krime lufte jeton lirshëm në Novi Sad”, shkruan Istraga.
Zoran Obranoviç Maljiç
Ai mori pseudonimin sepse vrau disa nga viktimat e tij me një çekiç. Emri i tij është në listën e anëtarëve të Skuadrës famëkeqe të Sabotazhit të Dhjetë të Ushtrisë së Republikës Srpska.
Zoran Obrenoviç Maljiç ishte një ndër “diversantët”, të cilët marshuan në Srebrenicë – 10 korrikun e vitit 1995.
Gjashtë ditë më vonë, njësia gjuajti për vdekje të paktën 1 mijë e 200 boshnjakë të kapur në Fermën Ushtarake Branjevo.
Sot, Maljiç jeton i pashqetësuar në Serbi, edhe pse për të është lëshuar një urdhër i kuq i Interpolit.
Momir Saviç
Momir Saviç, një kriminel lufte u thirr për të vuajtur dënimin me shtatëmbëdhjetë vjet burgim, për të cilat ishte dënuar në Vishegrad.
“Krimineli i luftës Momir Saviç është arratisur”, shpërfaqnin titujt e shumicës së mediave në BiH dhe rajon.
Gjykata e Bosnje dhe Hercegovinës lëshoi një urdhër për arrestimin e tij, por që atëherë të gjitha gjurmët e tij janë humbur.
Sot, Momir Saviç jeton i lirë në Serbi, ku u zhvendos para se të dënohej.
Saviç, ndër të tjera, u dënua për përdhunim në Vishegrad.
Svetozar Kosoriç
“Ky person është i paarritshëm nga autoritetet gjyqësore”, thuhet në faqen e Gjykatës së BiH-ut për emrin e Svetozar Kosoriç.
Kosoriç ka vite që jeton i lirë në Serbi, e cila kurrë nuk e ka marrë për shqyrtim rastin e tij.
Në drejtim të tij, rëndon akuza e ndihmës së anëtarëve të Shtabit të Trupave të VRS Drina, të cilët shfarosën një grup boshnjakësh dhe morën pjesën në kryerjen e një gjenocidi.
Asokohe, Kosoriç ishte Shef i Departamentit të Inteligjencës të VRS Drina.
Milisav Gavriç
Milisav Gavriç ishte zëvendës komandant i stacionit policor të Srebrenicës gjatë kohës së luftës.
“Një person i paarritshëm nga autoritetet gjyqësore”, citohet edhe për të në faqen e internetit të Gjykatës së BiH-ut.
Gavriç akuzohet për pjesëmarrje dhe ndihmesë në kapjen e organizuar dhe sistematike, shkaktimin e lëndimeve dhe ekzekutimin e boshnjakëve.
Asokohe, Gavriç mbante postin komandantit të Stacionit Policor të Srebrenicës.
Një urdhër i kuq i Interpolit është lëshuar për Gavriç. Përkundër kësaj, ai jetoi dhe punoi në gjendje të lirë në Serbi gjatë viteve të kaluara.
Marrë dhe përshtatur nga Istriga për Albanian Post.
/Albanianpost.com
