Krasniqi: KQZ-ja ta përfundojë pjesën e punës – zgjedhjet në katër komunat veriore të organizohen sa më shpejt

Ministri i Administrimit të Pushtetit Lokal, Elbert Krasniqi, ka kërkuar që Komisioni Qendror i Zgjedhjeve (KQZ), duhet ta përfundojë pjesën e punës sa më shpejt në mënyrë që të ketë votim në katër komunat veriore.

“KQZ duhet ta përfundojë pjesën e saj të punës dhe duhet të ketë votim në katër komunat së shpejti”, ka thënë Krasniqi.

Krasniqi, në debatin me temën “Efikasiteti dhe ndikimi i peticioneve të qytetarëve si mjet i ushtrimit të drejtave dhe ndryshime në shoqëri”, i organizuar nga Qendra Mediale në Çagllavicë, ritheksoi se nuk është duke vërejtur ndonjë pengesë ligjore që do ta bënte të pamundur mbajtjen e zgjedhjeve.

“Nuk shoh ndonjë pengesë ligjore që do ta bënte të pamundur mbajtjen e këtij votimi”, tha Krasniqi.

Ndërsa, ka sqaruar se kryetarët aktual kanë mungesë të legjitimitetit për shkak të numrit të pjesëmarrësve të ulët që kishin marrë në zgjedhjet lokale të prillit.

“Kryetarët aktualë nuk kanë legjitimitet të plotë për shkak të pjesëmarrjes së ulët të qytetarëve në zgjedhjet lokale të prillit të vitit 2023. Por, zgjedhjet është dashur të mbahen”.

Në komunat veriore të banuara me shumicë serbe – Mitrovicë e Veriut, Leposaviq, Zveçan dhe Zubin Potok – janë mbledhur numër i mjaftueshëm i nënshkrimeve për shkarkimin e krytearëve shqiptarë, ndonëse grupet nismëtare nuk kanë specifikuar se sa qytetarë kanë nënshkruar, duke thënë se janë mbledhur më shumë nënshkrime sesa kërkohet.

Në bazë të përllogaritjeve të KQZ-së, numri i përgjithshëm i qytetarëve që është dashur ta nënshkruajnë peticionin në komunën e Mitrovicës së Veriut është rreth 3 mijë e 640 votues.

Kurse në komunën e Leposaviqit, peticionin është dashuar ta nënshkruajnë rreth 2 mijë e 689, në mënyrë që të përmbushet kriteri prej 20 për qind të trupit elektoral në komunat përkatëse.

Kjo masë vlen njëjtë edhe për komunën e Zveçanit dhe Zubin Potokut.

Në komunën e Zveçanit janë të regjistruar 9 mijë e 229 votues, ndërsa rreth 1 mijë e 846 qytetarë përbëjnë 20 për qind të trupit elektoral.

Në komunën e Zubin Potokut, numri i qytetarëve me të drejtë vote është 6 mijë e 732. Rreth 1 mijë e 347 përmbushin kriterin prej 20 për qind të elektoratit.

Pas pranimit të nënshkrimeve, kryesuesit e kuvendeve komunale në veri duhet që brenda tri ditëve t’i dërgojnë në KQZ për verifikim.

Nga konstatimi që është përmbushur kriteri i nevojshëm prej 20 për qind, brenda 45 ditëve duhet të organizohet procesi zgjedhor ku qytetarët mund të votojnë nëse duan të shkarkojnë kryetarin e komunës përkatëse apo jo.

Një ndër kriteret e përcaktuara nga BE-ja për largimin e sanksioneve ndaj Kosovës të vendosura në qershor të vitit të kaluar për shkak të përshkallëzimit të situatës në vend është shpallja e zgjedhjeve të jashtëzakonshme dhe organizimi në mënyrë gjithëpërfshirëse në të gjitha katër komunat serbe në Veri, kurse nga serbët kërkohet që të marrin pjesë pa kushte.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.