Krasniqi dhe Haradinaj kërkojnë ndërgjegjësimin e shoqërisë për situatën e personave me aftësi të kufizuar

Kryetari i Partisë Demokratike të Kosovës (PDK), Memli Krasniqi, ka theksuar nevojën dhe urgjencën e mobilizimit institucional dhe shoqëror për, siç ka thënë ai, dinjitet, të drejta të barabarta dhe përmirësimin e mirëqenies së personave me aftësi të kufizuar, duke larguar kështu barrierat me të cilat ata përballen në jetën e tyre të përditshme.

Në Ditën Ndërkombëtare të Personave me Aftësi të Kufizuar, nëpërmjet një postimi në “Facebook” të dielën, kreu i PDK-së ka veçuar nevojën për të shtuar përpjekjet për të hequr pengesat me të cilat përballen personat me aftësi të kufizuar, ndërsa ka bërë thirrje që përkrahja ndaj kësaj kategorie shoqërore të jetë objektiv shtetëror prioritar.

“Integrimi i personave me aftësi të kufizuar duke u ofruar mundësi punësimi, mbështetje financiare dhe infrastrukturore, duhet të jetë objektiv shtetëror prioritar! Ata kanë nevojë për përkrahje meritore dhe për zbatim të kornizës ligjore që garanton të drejtat e tyre”, ka shkruar Krasniqi në llogarinë e tij.

E kryetari Aleancës për Ardhmërinë e Kosovës (AAK), Ramush Haradinaj, përmes një shkrimi të shkurtër në “Facebook” të dielën, ka kërkuar që në Ditën Ndërkombëtare të Personave me Aftësi të Kufizuar, shoqëria kosovare të reflektojë mbi guximin dhe përpjekjet e personave me aftësi të kufizuar në përballimin e sfidave ditore.

“Të ndajmë dashurinë, përkrahjen dhe respektin tonë, dhe të punojmë së bashku për vazhdimin e ndërgjegjësimit tonë si shoqëri, për zhdukjen e të gjitha paragjykimeve, heqjen e barrierave dhe krijimin e një ambienti që do të ofronte kushtet për një jetë sa më të lumtur për ta”, ka shkruar Haradinaj.

Dita Ndërkombëtare e Personave me Aftësi të Kufizuar (3 dhjetor), përfshihet në Rezolutën 47/3 të Asamblesë së Përgjithshme të Organizatës Kombeve të Bashkuara (OKB). Qëllimi i kësaj dite është promovimi i të drejtave, mirëqenies dhe rritja e ndërgjegjësimit lidhur me situatën e personave me aftësi të kufizuar në të gjitha sferat e shoqërisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.