Krasniqi dënon djegien e lokaleve të nënkryetares së Zveçanit, mirëpret vendimin e KQZ-së

Ministri i Administrimit të Pushtetit Lokal, Elbert Krasniqi, pas djegies së dy lokaleve të nënkryetares së Komunës së Zveçanit, Natasha Tomaniç, ka thënë se ka kaluar koha kur bandat kriminale kanë frikësuar Kosovën.

Krasniqi, përmes një shkrimi në rrjetin social ‘Facebook’ ka thënë se ofrojnë mbështetjen e nevojshme ndaj komunitetit serb për të luftuar krimet.

“Grupet kriminale në Zveçan vazhdojnë me sulme dhe terror, kësaj radhe cak i tyre ishte dyqani privat i nënkryetares së Komunës së Zveçanit, znj. Natasha Tomaniq. Si institucione shtetërore e dënojmë këtë akt dhe ju ofrojmë mbështetje qytetarëve nga komuniteti serb në luftën tonë të përbashkët kundër grupeve kriminale”, ka shkruar ai në Facebook.

Tutje ai e ka mirëpritur vendimin e Komisionit Qendror të Zgjedhjeve për zgjedhjet e reja në komunat veriore më 21 prill.

“Gatishmëria jonë për realizimin e vullnetit të qytetarëve do të vazhdoj në përputhje me kushtetutën dhe legjislacionin në fuqi, ka kaluar koha kur bandat kriminale frikësonin Republikën me sulme. Vullneti qytetar do të respektohet ndërkohë që krimi do të ndëshkohet dhe nuk do të tolerohet”.

Edhe, kryeministri i Kosovës, Albin Kurti, ka reaguar pasi që nënkryetares së Zveçanit, Natasha Tomaniç, i janë djegur dy lokale në qendër të kësaj komune.

Duke kërkuar që ambasadorët e vendeve të QUINT-it (Gjermanisë, Francës, Italisë, Shteteve të Bashkuara të Amerikës dhe Mbretërisë së Bashkuar) dhe ai i Bashkimit Evropian, ta dënojnë këtë akt, siç ai e quajti, terrorist dhe kriminal.

Në orët e para të së premtes, nënkryetares së Komunës së Zveçanit, Natasha Tomaniç, i janë djegur dy lokale në qendër të Komunës së Zveçanit.

Në raportin 24 orësh të Policisë së Kosovës bëhet e ditur se Tomaniç ka thënë se dyshon se zjarri i është vënë qëllimshëm nga persona të dyshuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.