Kosto prej 50 mijë eurosh për dritat e dekorimeve në Prishtinë

Komuna e Prishtinës tashmë ka ndezur dritat e dekorimeve dedikuar festave të fundvitit, ndërkaq ani pse ishe planifikuar që kjo të ndodhte në ditën e parë të muajit dhjetor, e njëjta u realizua për nder të 28 nëntorit, për të shënuar ditën e shpalljes së Pavarësisë së Shqipërisë.

Një investim i tillë komunës së Prishtinës i ka kushtuar jo më pak se 50 mijë euro, ndërsa këshilltarja e kësaj komune, Mimoza Sylejmani, ka deklaruar për Albanian Post se dekorimet e fundvitit do të qëndrojnë aktive përafërsisht deri me datën 10 janar të vitit që po vjen.

Sylejmani ka treguar se situata e rënduar me pandemi ishte një nga arsyet më të forta që të vihen dritat e dekoreve në Prishtinë, teksa ka thënë se një lule në logon e sivjetme – “Prite n’shesh” simbolizon rilindjen.

“Motivi ishte pandemia, prandaj në mes është edhe një lule që do të thotë rilindje. Kemi qelë përsëri pas dy vjetësh të errta më COVID-19, me shpresë që nuk do ta përjetojmë më. Ndërsa yjet janë simbol i vitit të ri”, ka thënë Sylejmani.

Edhe kësaj radhe, dekorimet me theks të veçantë janë në sheshet kryesore të kryeqytetit, ndërkohë që pamjet e publikuara kanë marrë pëlqyeshmërinë e publikut.

Mes tjerash, Sylejmani, tregon se i gjithë projekti i dritave të dekorimeve për festat e fundvitit është disenjuar nga Zyra për Rigjenerim Urban në bashkëpunim me zyrtarë komunal, teksa i njëjti është realizuar nga kompania private “Anea Group”.

Gjatë këtij viti po ashtu do të kthehen edhe shtëpizat e drurit në sheshin kryesor të Prishtinës – “Skëndërbe”, ku edhe është improvizuar një skenë për performanca të muzikantëve vendorë dhe të huaj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.