Kosovë: Zvogëlohet numri i lindjeve, migrimi në rritje

Me rastin e Ditës Botërore të Popullsisë, Udhëheqësja e Zyrës së Fondit të Kombeve të Bashkuara për Popullaten (UNFPA) në Kosovë, Visare Mujko-Nimani, ka deklaruar se pandemia ka përshpejtuar trendin global drejt nivelit të ulët të fertilitetit.

Rënia e numrit të lindjeve sipas Nimanit, “ka nxitur ankth”, derisa ka shtuar se Kosova po përballet me migrimin.

“Pandemia mund ta ketë përshpejtuar trendin global drejt nivelit të ulët të fertilitetit. Në Evropën Lindore ky problem është rritur edhe nga emigracioni. Edhe Kosova po përballet me çështjen e migrimit dhe institucionet duhet të ofrojnë politika për të ardhmen e tyre”.

UNFPA në bashkëpunim me Komisionin për Shëndetësi dhe Mirëqenie Sociale, kanë organizuar tryezën e diskutimit me temën “Të drejtat dhe zgjedhjet janë përgjigja: Qoftë rritja apo zvogëlimi i numrit të foshnjave, zgjidhja për të ndryshuar normat e lindshmërisë qëndron në prioritizimin e shëndetit dhe të drejtat riprodhuese të të gjithë njerëzve”.

Në këtë tryezë diskutimi e pranishme ishte edhe Kryetarja e Komisionit për Shëndetësi dhe Mirëqenie Sociale, Fatmire Kollçaku, e cila ka thënë se Kosova duhet të jetë një shtet ku të rinjtë e të rejat të dëshirojnë të qëndrojnë e jetojnë.

Sipas saj, është e qartë rënia e trendit të fertilitetit.

“Jemi ballafaquar me Covid-19 dhe kemi pasur rënie të numrit të lindjeve në nivel global, edhe ngase dëshira dhe mundësia nuk janë të njëjta. Si parakusht është mos keqpërdorimi i parasë publike”.

“Duhet të kalojmë nga fjalët në vepra, si shoqëri duhet të ndryshojmë, të kursejmë dhe ruajmë paranë publike që është një nga zotimet kryesore e fushatës, që mos të keqpërdoret paraja publike sepse mendoj që sado që kemi qenë të varfër aq ishim edhe të vjedhur”, shtoi ajo.

Ndërkaq, Ulrika Richardson, Koordinatore për zhvillimin e Kombeve të Bashkuara, theksoi se pandemia COVID-19 ka shkaktuar tkurrje sa i përket rritjes së trendit të fertilitetit.

Mirëpo sipas saj, shumë vende të tjera kanë gjetur alternativa të ndryshme të cilat kanë pasur ndikim pozitiv për të ndaluar këtë trend.

“Ka tendenca që të bëhet rikthimi. Popullata është krenari për kapitalin njerëzor dhe kjo lidhet me identitetin tonë dhe është një sens i shqetësimit për zvogëlimin e numrit të popullatës, e sidomos në Ballkanin Perëndimor. Nëse flasim për fertilitetin ne e dimë se kur duhet të kemi një fëmijë dhe kjo është e drejtë e secilit dhe duhet ta kenë këtë mundësi”, është shprehur ajo.

Ndërsa, Kryeshefi i Agjencisë së Statistikave të Kosovës, Ilir Berisha, ka treguar se për shkak të pandemisë COVID-19, regjistrimi i popullsisë është shtyrë për vitin e ardhshëm.

“Projekti i regjistrimit të popullsisë që ka qenë në plan të realizohet këtë vit është shtyrë për vitin e ardhshëm”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.