Kosovë: PDK mbanë mbledhjen konstituive të Kryesisë së re

Kryetari i Partisë Demokratike të Kosovës (PDK), Memli Krasniqi ka mbajtur të premten mbledhjen konstituive me anëtarët e Kryesisë së re, një ditë pas zgjedhjes së tyre në krye të këtij subjekti politik nga Këshilli Drejtues.

Në këtë mbledhje janë ndarë detyrat e punës për të realizuar programin partiak dhe reformave për “fitoret e ardhshme për PDK-në dhe Kosovën”, thuhet në njoftimin e PDK-së.

Kryetari i ri, Memli Krasniqi ju ka dëshiruar mirëseardhje në PDK anëtarëve të rinj të Kryesisë, të cilët i janë bashkuar PDK-së dhe vizionit të saj si parti shtet formuese.

Krasniqi mirëseardhje dhe urata pati edhe për anëtarët e rinj të Kryesisë që janë rritur politikisht në parti e që tani kanë arritur të përfaqësohen edhe në Kryesi të këtij subjekti politik.

Kreu i PDK-së në këtë mbledhje nuk ka lënë pa falënderuar të gjithë anëtarët e Këshillit Drejtues, për besimin e dhënë për Kryesinë e re, e cila siç është shprehur ai, ka para vetes shumë punë e sfida drejt arritjes së fitores së PDK-së në zgjedhjet e ardhshme.

Temë e diskutimit në mbledhjen e Kryesisë së re, ka qenë edhe përgatitja e deritanishme për Zgjedhjet Lokale të 17 tetorit.

Krasniqi ka thënë se PDK ka kandidatët më të mirë dhe më kredibil për të udhëhequr me komunat dhe qytetarët e Kosovës sepse sipas tij ata ofrojnë programin më të mirë qeverisës për të udhëhequr komunat e vendit.

Nga ana tjetër edhe anëtarët e Kryesisë së re të PDK-së falënderuan kryetarin Memli Krasniqi dhe Këshillin Drejtues për besimin e dhënë dhe mundësinë e ofruar për të dhënë kontribut në vizionin e PDK-së për të ardhmen e Kosovës.

Një ditë pas zgjedhjes së Kryesisë së re, ish ushtruesi i detyrës së Kryetarit të PDK-së, Enver Hoxha ka njoftuar se nuk ka pranuar pozitën e Nënkryetarit.

Ai këtë e ka bërë të ditur nëpërmjet rrjetit social Facebook, duke falënderuar kryetarin Krasniqi dhe anëtarët e Këshillit Drejtues të PDK-së për besimin e dhënë që të jetë pjesë e Kryesisë së re të partisë dhe njëri nga nënkryetarët e saj.

“Me të drejt u diskutua dje dhe sot nëse po shmangej me përfshirjen time një parim i vendosur që deputetët të mos përfshihen në kryesinë e re. Në vijëmësi të qëndrimit të shprehur edhe në Konventën e zgjedhjes së kryetarit të ri që PDK ka nevojë të hapet, të afrojë njerëz ti ri dhe reformohet, unë do ta respektoj këtë parim dhe do të mbetem vetëm deputet”, ka shkruar ai.

Ai tutje ka thënë se “Është koha që ekipi i ri e kryesia e sapo votuar të punoj dhe angazhohet për ta rikthyer PDK-në si forca e parë politike”. Për këtë Hoxhaj ka thënë se do të “angazhohen me tërë qenien time për ta ndihmuar partinë si dhe kandidatët tonë në zgjedhjet lokale”.

Edhe anëtarja e re e zgjedhur në Kryesi, Donika Shahini-Lami është tërhequr nga anëtarja e Kryesisë. Arsyeja e tërheqjes së saj është personale thuhet në postimin e bërë në llogarinë e saj në Facebook.

“Mirënjohëse ndaj lidershipit të ri të Partisë Demokratike të Kosovës, për besimin duke më ofruar dhe besuar të jem pjesë e kryesisë së re. Por, për arsye personale, bëj të ditur se nuk do ta filloj këtë rrugëtim. Shëndet, suksese dhe gjitha të mirat”, ka shkruar ajo.

Kurse Migjen Kelmendi i cili kishte aderuar në PDK në prag të zgjedhjeve nacionale të vitit 2019 i cili ishte edhe anëtar i Kryesisë së këtij subjekti politik, ka bërë të ditur tërheqjen e tij nga PDK vetëm një ditë pas zgjedhjes së Kryesisë së re, duke shkruar se “Edhi koha me ec”.

Këshilli Drejtues i PDK-së, të enjten 5 gushtit kishte zgjedhur nënkryetarë Vlora Çitaku, Enver Hoxhaj, Uran Ismaili e Ramë Bujën dhe sekretar të përgjithshëm, Bajrush Xhemajli.

Ndërsa, anëtarë të Kryesisë: Bernard Nikaj, Donika Shahini, Jakup Nura, Bekim Qollaku, Nexhat Demaku, Evgjeni Thaci-Dragusha, Sokol Bashota, Besa Kabashi Ramaj, Adri Nurellari, Rashit Qalaj, Zenun Pajaziti, Valdete Idrizi, Betim Gjoshi, Fehmi Mujota, Petrit Hajdari, Luljeta Veselaj-Gutaj, Blerand Stavileci, Muzafer Shala, Muhamet Haliti, Kujtimi Gashi, Safete Hadergjonaj ndërkaq Donjet Bislimi është kryetar i Rinisë Demokratike të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.