Kosovë/ Kuçi:“Qeveria reagoi vetëm pas presionit të qytetarëve”

Zyrtarja e Partisë Social Demokrate (PSD), Natyra Kuçi, ka thënë se reagimi i Qeverisë për arrestimet e së premtes ka ardhur vetëm pas presionit të qytetarëve dhe opinionit publik.

Ajo tha se reagimi i kësaj Qeverie ka qenë i vonshëm dhe ka ardhur vetëm prej zorit.

“Reagimi i Qeverisë nuk erdhi pasi u përdor dhunë nga policia, as pasi u arrestuan aktivistët. Qeveria ka reaguar vetëm pas presionit të madh të qytetarëve dhe opinionit publik. Prandaj reagimi doli në ora 23:00. Kjo është mënyra e vetme sesi ky pushtet matet. Reagimi është i vonshëm, dhe erdhi prej zorit”, tha Kuçi.

Ajo theksoi se Qeveria nuk mund të fshihet pas pezullimit të një polici.

“Dhuna policore ndaj aktivistëve tregon për fillimin e përndjekjeve. Ajo merr forma të ndryshme në kohë, por qëllimi është i njëjtë: paqtimi i dallimeve, dëgjueshmëria, disiplinimi. Policët më të zellshëm në ushtrimin e dhunës janë ata që marrin tagrin moral e politik prej popullzimit të Kryeministrit Kurti”.

Kuçi, përsëri kërkoi sqarim nga Qeveria, “Por t’i kthehemi përsëri pyetjes qendrore: Pse 5 euro tiketë? Pse po krijohet monopoli? Pse?”.

Nënshkrimi i një marrëveshje mes Ministrisë së Mjedisit, Planifikimit Hapësinor dhe Infrastrukturës dhe kompanisë “Auto Control Kosova”, që të paguhen 5 euro shtesë me rastin e kontrollit teknik të automjetit, i cili është i nevojshëm për regjistrimin e tij, ka bërë që të premten PSD-ja të bëjë një protestë, në të cilin përfunduan të arrestuar tetë persona.

Reagimi i tyre vjen për arsyen se mbi 2 milionë euro, në vit do t’iu jepen një kompanie private. Sipas tyre çmimi është 5 fish më i shtrenjtë, dhe 90 për qind e tij është fitim për kompaninë, e cila ka gjithsej 3 punëtorë.

Kompania, e cila pritet të lëshojë këto tiketa për automjete, figuron si e regjistruar në Agjencinë për Regjistrim të Bizneseve në vitin 2018 dhe numëron tre punëtorë.

Në mediat sociale, qytetarë, deputetë e parti opozitare, kanë kundërshtuar këtë marrëveshje duke thënë se qytetarët po ngarkohen me tarifa të panevojshme.

Ndërkaq, Kartoni i Gjelbër vërteton se një automjet përfiton në mënyrë të mjaftueshme nga mbulimi i përgjegjësisë nga sigurimi. Kështu, kur makina përfshihet në një aksident në territorin e një shteti ku vlen sistemi i Kartonit të Gjelbër, sigurimi mbulon koston (e lëndimit, dëmtimit, etj).

Përpjekjet e autoriteteve në Kosovë për anëtarësim në Këshillin e Byrove Evropiane, që siguron Kartonin e Gjelbër, po sfidohen nga dy probleme thelbësore.

Së pari, Kosova nuk është shtet anëtar i Organizatës së Kombeve të Bashkuara (OKB) dhe së dyti, në Kosovë ka një numër të madh të automjeteve të paregjistruara, të cilat janë edhe të pasiguruara në qarkullim, çka e bën të pamundur sigurimin e Kartonit të Gjelbër.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.