Kosova ‘përkohësisht’ pa mbrojtjen e senatorit Menendez – do t’i duhet ta mbrojë veten ndaj akuzave për korrupsion

Një politikanët me ndikim në Shtetet e Bashkuara të Amerikës (SHBA), i cili ka shfrytëzuar pozitën e tij të lartë për të mbrojtur pozicionin e Kosovës, posaçërisht në dialogun për normalizimin e marrëdhënieve ndërmjet Kosovës dhe Serbisë nën ndërmjetësimin e Bashkimit Evropian (BE), nuk do të jetë – përkohësisht – në dispozicion për të luajtur rolin e “gardianit” dhe “promovuesit” të interesave të Kosovës në Uashington.

Bëhet fjalë për senatorin demokrat, Robert (Bob) Menendez, i cili ka dhënë dorëheqje të përkohshme nga pozita e Kryetarit të Komitetit për Marrëdhënie me Jashtë në Senatin e SHBA-ve pas ngritjes së aktakuzës për ryshfet nga Departamenti i Drejtësisë. Ai dhe bashkëshortja e tij, Nadine Menedez, akuzohen, ndër të tjera, se kanë pranuar ryshfet (para, ari, pagesa të qirasë së shtëpisë dhe një veturë luksoze) nga tre biznesmenë të New Jerseyt.

Duke qenë se senatori 69-vjeçar ka përdorur pozitën e tij të lartë për t’i dhënë mbështetje Kosovës në dialogun me Serbinë dhe ka kërkuar llogaridhënie të vazhdueshme nga diplomatët dhe zyrtarët amerikanë lidhur me ecurinë e procesit të dialogut, me largimin e tij mund të shuhet një dritë që kishte mbetur ndezur edhe pas qortimeve të administratës amerikane ndaj Qeverisë së Kosovës, veçanërisht pas diferencave në qëndrime për situatën në pjesën veriore të vendit të banuar me shumicë serbe.

Senatori Menendez ka qenë njëri ndër iniciatorët kryesorë të letrës së dhjetëra ligjvënësve evropiano-amerikanë dhe shefave të komiteteve parlamentare për politikë të jashtme, drejtuar niveleve më të larta diplomatike në Uashington, Bruksel dhe Londër, ku kërkohej një qasje më e ashpër dhe më e vendosur ndaj Serbisë dhe po ashtu, rikthimin e ekuilibrit dhe proporcionalitetit në dialogun Prishtinë-Beograd.

“Ne kërkojmë që komuniteti ndërkombëtar të nxjerrë mësime nga e kaluara dhe të sigurojë që ne të mos ndjekim politika ku në qendër është Beogradi. Të shqyrtohet një politikë e diplomacisë parandaluese për të parandaluar një përkeqësim të mëtejshëm të situatës së sigurisë në veri të Kosovës. Ata që mbrojnë shtetin ligjor dhe demokracinë nuk duhet të qortohen. Kosova është një vend sovran dhe një demokraci funksionale”.

Njeriu i cili ka mbijetuar politikisht për gati pesë dekada, do të fitonte simpatinë e kosovarëve kur në seancën dëgjimore të Komitetit për Marrëdhënieve me Jashtë lidhur me politikën e SHBA-ve në Ballkanin Perëndimor, kishte mbajur të zënë dy top-diplomatët amerikanë – Gabriel Escobar dhe Derek Chollet – duke parashtruar disa dilema rreth vijimësisë së procesit të dialogut dhe qasjen e tyre ndaj palëve që preknin thelbin e rrjedhës së tensionuar të marrëdhënieve ndërjmet Kosovës dhe Serbisë.

Në cilësinë e kryetarit, ai kishte kërkuar përgjigje rreth Asociacionit të Komunave me shumicë serbe, mosgatishmërisë së presidentit serb, Aleksandër Vuçiç, për ta nënshkruar Marrëveshjen Bazë dhe për t’i vendosur sanksione Rusisë për agresionin në Ukrainë, serisë së shkeljeve të Marrëveshjes së Brukselit dhe Aneksit të Ohrit nga pala serbe, garancive që “instrumenti vetë-menaxhues” për serbët e Kosovës të mos paraqesë nivel të tretë të pushtetit dhe çështjen e diskriminimit të shqiptarëve në Serbi.

Senatori Menedez deklarohej se përderisa në kohën kur presioni i SHBA-ve dhe BE-së ishte orientuar kryesisht ndaj Kosovës në lidhje me Asociacionin e Komunave me shumicë serbe, kur në fakt Kosova ishte pajtuar për themelimin e tij, presidenti serb po promovonte idenë nacionaliste të “botës serbe”, në një linjë të njejtë me vizionin e “botës ruse” të presidentit të Rusisë, Vladimir Putin, derisa paraqitej konstruktiv para Perëndimit.

“Kjo është pjesë e sjelljes së Vuçiçit, i cili thotë një gjë para liderëve perëndimorë dhe thotë krejt diçka tjetër para popullit serb, përmes mediave të kontrolluara nga shteti. Duke kontrolluar sferën e informacionit dhe duke shtypur shoqërinë civile, ai vazhdon të përqafojë narrativën nacionaliste”.

Në kohën kur e gjithë bashkësia e organizuar ndërkombëtare po e akuzonte Qeverinë e Kosovës për përshkallëzimin e situatës në veriun e territorit të banuar me serbë etnikë, senatori Menendez nëpërmjet një deklarate shprehej i idinjuar me qortimin e SHBA-ve dhe BE-së ndaj një partneri ekzistencial.

“Jam thellësisht i shqetësuar nga përshkallëzimi i dhunës në veri të Kosovës dhe gjithashtu i zhgënjyer nga reagimi i bashkësisë ndërkombëtare. Derisa të gjitha palët kanë përgjegjësi, ne duhet të jemi sy hapur në vlerësimin e situatës dhe të jemi të gatshëm të theksojmë mangësitë në të dyja anët”.

Kjo nuk është hera e parë që senatori Menendez, i cili ka shërbyer në Senatin e SHBA-ve që prej vitit 2006, ka ofruar dorëheqje nga Komiteti për Marrëdhënie me Jashtë. Ai edhe në vitin 2015 ishte larguar përkohësisht sepse ishte ngritur aktakuzë ndaj tij nën dyshimet se kishte marrë ryshfet, por sikurse atëherë, ai ka thënë se rasti është i motivuar politikisht.

Me largimin e senatorit Menendez nga pozita e kryetarit për politikë të jashtme në legjislativin amerikan, ngushtohet edhe lista e mbështetësve të Qeverisë së Kosovës në nivele të larta në Uashington, në një kohë kur marrëdhëniet mes ekzekutivit në Prishtinë dhe bashkësisë së organizuar ndërkombëtare në krye me SHBA-të janë në gradën e fundit për shkak të degjenerimit të bashkëveprimit diplomatik.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.