Lajme

Kosova dhe Serbia do të përfitojnë nga Plani i Rritjes së BE-së duke u vlerësuar ndarazi  


Ilustrim

Kosova dhe Serbia do të vlerësohen ndarazi nga Bashkimi Evropian për mundësinë e përfitimit nga Plani i Rritjes së Unionit i cili parasheh një buxhet prej 6 miliardë eurosh për Ballkanin Perëndimor.

Kështu të paktën ka bërë të ditur Drejtori i Përgjithshëm i BE-së për Negociatat për Zgjerim dhe Fqinjësi, Gert Jan Koopman, gjatë një diskutimi të zhvilluar të mërkurën në Komisionin e BE-së për Politikë të Jashtme dhe Buxhet.

Thënë kjo, sipas Koopman kushtet specifike që do të jenë për Kosovën dhe Serbinë kanë të bëjnë me faktin se si dy këto shtetet do t’i qasen procesit të dialogut i ndërmjetësuar nga BE-ja.

“Kjo do të bëhet në mënyrë individuale për secilin nga këto dy vende. Me fjalë tjera, nëse njëri vend nuk avancon, vendi tjetër nuk do të pengohet, nëse avancon në reforma”, ka thënë ai.

Duke folur për kushtet, ai ka përmendur sidomos sundimin e ligjit, respektimin e të drejtave të njeriut dhe respektimin e vlerave demokratike.

Ai ka thënë se pagesat nga Plani për Rritje do të kryhen vetëm pasi të ketë dëshmi se janë ndërmarrë reformat e nevojshme.

Gert Jan Koopman

Sipas Komisionit Evropian, gjysma e mjeteve nga Plani për Rritje në rajonin e Ballkanit Perëndimor, do të shkojnë në kuadër të kornizës për investime, sepse mjetet ekzistuese që janë në dispozicion, nuk janë të mjaftueshme për t’i kryer investimet e duhura.

Pjesa tjetër do të shkojë direkt në buxhetin e vendeve, për të financuar disa nga reformat e nevojshme.

Koopman ka treguar se modeli do të jetë i thjeshtëzuar, për t’iu përshtatur Ballkanit Perëndimor, por duke respektuar edhe rregullat e BE-së.

Komisioni Evropian beson se ky plan – nga i cili do të ndahen mjete specifike për secilin vend – do të ndryshojë shumë rajonin e Ballkanit dhe do të jetë gjenerator për rritje të konsiderueshme ekonomike.

Zyrtari i lartë i Komisionit Evropian ka sqaruar se një pjesë e mjeteve financiare do t’iu jepen vendeve të rajonit si asistencë pa kthim dhe një pjesë do të jetë në formën e kredive të favorshme.

Ai ka thënë se këto kredi janë të domosdoshme, pasi vendet e rajonit nuk kanë mundësi që në tregun ndërkombëtar të sigurojnë kredi me kushte të favorshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore