Koreja e Jugut miraton rregulla të reja për dyqanet e aplikacioneve

Koreja e Jugut ka miratuar rregulla lidhur me një ligj që ndalon operatorët dominues të dyqaneve të aplikacioneve që të detyrojnë zhvilluesit e software-it të përdorin sistemet e tyre të pagesave.

Kështu ka bërë me dije rregullatori i telekomunikacionit në vend.

Lëvizja e ndërmarrë përbën një ndryshim në Aktin e Biznesit të Telekomunikacionit, i nxjerrë vitin e kaluar.

Ai ishte frenimi i parë i tillë nga një ekonomi e madhe për kompani si Apple dhe Google, të cilat përballen me kritika globale për kërkesën e përdorimit të sistemeve të pagesave që ngarkojnë komisione deri në 30 për qind.

Rregullat priten të hyjnë në fuqi më datë 15 mars.

Ato specifikojnë se ligji ndalon “aktin e detyrimit të një mënyre specifike pagese ndaj një ofruesi të përmbajtjes celulare”, duke përdorur në mënyrë të padrejtë statusin e operatorit të tregut të aplikacioneve.

“Për të parandaluar shmangien indirekte rregullatore, llojet dhe standardet e akteve të ndaluara janë krijuar që të jenë të mundura brenda fushëveprimit të deleguar nga ligji”, ka treguar kryetari i Komisionit të Komunikimit, Han Sang-hyuk.

Aktet e ndaluara përfshijnë operatorët e tregut të aplikacioneve që vonojnë në mënyrë të padrejtë shqyrtimin e përmbajtjes celulare, ose refuzojnë, vonojnë, kufizojnë, fshijnë ose bllokojnë regjistrimin, rinovimin ose inspektimin e përmbajtjes celulare që përdor metoda pagese të palëve të treta.

Nga ana tjetër, gjobat e mundshme në rast shkeljeje do të shkojnë deri në dy për qind të të ardhurave mesatare vjetore nga praktikat e lidhura të biznesit.

Marrë nga “Reuters”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.