Kongresi amerikan miraton marrëveshjen e borxhit publik

Kongresi amerikan ka miratuar legjislacionin dypartiak të mbështetur nga presidenti Joe Biden që heq tavanin e borxhit publik prej 31.4 trilionë dollarësh të qeverisë.

Një lëvizje kjo, që shmang atë që do të kishte qenë një mospagim i parë kombëtar.

Senati votoi me 63 vota pro dhe 36 kundër për të miratuar projektligjin që ishte miratuar më herët nga Dhoma e Përfaqësuesve.

Departamenti i Thesarit kishte paralajmëruar se nuk do të ishte në gjendje të paguante të gjitha faturat e tij më 5 qershor nëse Kongresi nuk do të vepronte deri atëherë.

“Ne po shmangim falimentimin sonte”, ka thënë udhëheqësi i shumicës në Senat, Chuck Schumer, teksa drejtonte legjislacionin përmes dhomës së tij prej 100 anëtarësh.

Sakaq, Biden vlerësoi veprimin në kohë të Kongresit.

“Kjo marrëveshje dypartiake është një fitore e madhe për ekonominë tonë dhe popullin amerikan”, ka thënë presidenti demokrat në një deklaratë.

Ai ka shtuar se do ta nënshkruajë atë në ligj sa më shpejt të jetë e mundur dhe nënshkrimi i tij do t’i kursejë SHBA-të nga një dështim katastrofik në borxhin prej 31.4 trilionë dollarësh.

Mospagimi do të kufizonte aftësinë e qeverisë për të marrë hua më shumë para ose për të paguar të gjitha faturat.

Po ashtu do të kërcënonte të bënte kërdi jashtë shtetit, duke ndikuar në çmimet dhe normat e hipotekave në vende të tjera.

Në seancën e së enjtes, projektligji kaloi me mbështetjen e 44 demokratëve dhe 17 republikanëve, plus dy të pavarur.

60 vota u kërkuan për të miratuar masën në një dhomë me 100 vende që demokratët e kontrollojnë vetëm ngushtë.

31 republikanë ishin kundër, duke përfshirë një anëtar të udhëheqjes së partisë në dhomë, John Barrasso.

Midis katër demokratëve që votuan kundër ishin senatorët e krahut të majtë Bernie Sanders, John Fetterman dhe Elizabeth Warren.

Ata fillimisht propozuan 11 amendamente për projektligjin e tavanit të borxhit, por ato u refuzuan të gjitha me një rend të shpejtë, duke hapur rrugën për një votim përfundimtar.

Nëse një prej amendamenteve do të kishte kaluar, i gjithë projektligji do të duhej të kthehej përsëri në Dhomën e Përfaqësuesve, duke lënë pak kohë për të siguruar kalimin përfundimtar të masës.

Marrëveshja u kalua lehtësisht nga Dhoma e Përfaqësuesve të mërkurën në mbrëmje me një votim 314-117.

Rreth 165 demokratë iu bashkuan 149 republikanëve në miratimin e tij me shumicën e thjeshtë të kërkuar.

Me republikanët në kontrollin e Dhomës së Ulët të Kongresit dhe demokratët që kanë pushtet në Senat dhe Shtëpinë e Bardhë, një marrëveshje rezultoi e pakapshme për javë të tëra derisa Biden dhe kryetari i Dhomës së Përfaqësuesve Kevin McCarthy nënshkruan një kompromis fundjavën e kaluar.

Marrëveshja pezullon tavanin e borxhit, kufirin e shpenzimeve të vendosur nga Kongresi që përcakton se sa para mund të marrë hua qeveria, deri më 1 janar 2025.

Legjislacioni do të rezultojë në 1.5 trilionë dollarë kursime gjatë një dekade, sipas Zyrës së pavarur të Buxhetit të Kongresit.

Përmbajtja e projektligjit tërhoqi kundërshtime si nga republikanët e krahut të djathtë ashtu edhe nga demokratët e majtë, por kishte më shumë centristë politikë në të dyja partitë për ta kaluar atë.

Herën e fundit që SHBA-të iu afruan kaq afër kapërcimit të tavanit të borxhit, në vitin 2011, agjencia e kreditit Standard & Poor’s uli vlerësimin e vendit, një lëvizje që ende nuk është ndryshuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.