Konfirmohet raportimi i Albanian Post: Vehbi Miftari emërohet ambasador në Misionin e Posaçëm të Kosovës në Vatikan

Presidentja e Kosovës, Vjosa Osmani, ka emëruar të premten Vehbi Miftarin ambasador në Misionin e Posaçëm në Vatikan, ashtu sic kishte raportuar Albanian Post, më 19 dhjetor të 2023-ës.

Lajmin e ka bërë të ditur Miftari, përmes një shkrimi në rrjetin social ‘Facebook’.

“E falënderova Presidenten për bashkëpunimin e shkëlqyer dhe besimin e saj dhe të institucioneve të vendit që nga 1 shkurti të udhëheq misionin e sapothemeluar të Kosovës në Selinë e Shenjtë/Vatikan”, ka shkruar Miftari në Facebook.

Ai tutje e ka vlerësuar lart besimin e Osmanit për të shërbyer si këshilltar politik i saj.

“Sot, pas tri vjetësh angazhimi si këshilltar politik i Presidentes Vjosa Osmani, e përmbylla angazhimin tim në Zyrën e Presidentes së Kosovës. Ka qenë përvojë fort e vyer në shërbim të Republikës”.

Më 12 janar, presidentja e Kosovës, Vjosa Osmani, ka dekretuar formalisht hapjen e Misionit të Posaçëm të Kosovës në Selinë e Shenjtë, për çka Albanian Post pati raportuar me 19 dhjetor të vitit të kaluar.

Ndryshe për hapjen e një zyre ndërlidhëse në Selinë e Shenjtë kishte raportuar Albanian Post më 19 dhjetor të vitit të kaluar kur ministrja e Punëve të Jashtme të Kosovës, Donika Gërvalla-Schëarz, kishte njoftuar mbi hapjen e “një zyre të re” në një vend shumë të rëndësishëm.

Burime të Albanian Post brenda MPJD-së kishin bërë të ditur se udhëheqës i zyrës ndërlidhëse pritet të emërohet ish-këshilltari në Presidencën e Kosovës, Vehbi Miftari, i cili aktualisht shërben si përfaqësues për kontakte në kuadër të Ambasadës së Kosovës në Itali.

Ky vend ende nuk e ka njohur pavarësinë e Kosovës, ndonëse shteti kosovar ka përfaqësuesin e vet dhe kërkesa për njohje ekziston prej kohësh në Vatikan. Megjithatë, në Selinë e Shenjtë nuk kanë munguar as takimet e herëpasherëshme të Papa Françeskut apo të Sekretarëve të Shtetit me zyrtarë të lartë kosovar, përfshirë kryeministra, ministra e presidentë të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.