Konfirmohet raportimi i Albanian Post: Osmani njofton për hapjen e Misionit të Posaçëm të Kosovës në Vatikan

Presidentja e Kosovës, Vjosa Osmani, këtë të premte ka dekretuar formalisht hapjen e Misionit të Posaçëm të Kosovës në Selinë e Shenjtë, për çka Albanian Post pati raportuar me 19 dhjetor të vitit të kaluar.

Lajmin e AP-së me burime nga brenda Ministrisë së Punëve të Jashtme, e konfirmoi Osmani këtë të premte, duke njoftuar se hapja e kësaj zyre “ka ardhur pas dy vitesh punë intensive me Selinë e Shenjtë”.

Gërvalla njoftoi hapjen e “një zyre të re” para vitit të ri – AP kupton se bëhet fjalë për Vatikanin

“Ky është hap i rëndësishëm për Kosovën dhe raportet tona me Selinë e Shenjtë, të cilat do të vazhdojmë t’i thellojmë”, ka potencuar ndër të tjera Osmani.

Ndryshe për hapjen e një zyre ndërlidhëse në Selinë e Shenjtë kishte raportuar Albanian Post më 19 dhjetor të vitit të kaluar kur ministrja e Punëve të Jashtme të Kosovës, Donika Gërvalla-Schwarz, kishte njoftuar mbi hapjen e “një zyre të re” në një vend shumë të rëndësishëm.

Burime të Albanian Post brenda MPJD-së kishin bërë të ditur se udhëheqës i zyrës ndërlidhëse pritet të emërohet ish-këshilltari në Presidencën e Kosovës, Vehbi Miftari, i cili aktualisht shërben si përfaqësues për kontakte në kuadër të Ambasadës së Kosovës në Itali.

Ky vend ende nuk e ka njohur pavarësinë e Kosovës, ndonëse shteti kosovar ka përfaqësuesin e vet dhe kërkesa për njohje ekziston prej kohësh në Vatikan. Megjithatë, në Selinë e Shenjtë nuk kanë munguar as takimet e herëpasherëshme të Papa Françeskut apo të Sekretarëve të Shtetit me zyrtarë të lartë kosovar, përfshirë kryeministra, ministra e presidentë të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.