Konferenca e parë Ndërqeveritare me Shqipërinë të caktohet sa më parë, thotë Santos

Raportuesja për Shqipërinë në Parlamentin Evropian, Isabel Santos, ka theksuar sërish në fjalën e saj se vendi ynë i ka përmbushur kushtet dhe duhet caktuar një datë për mbajtjen e Konferencës së parë Ndërqeveritare.

“Konferenca e parë duhet të mbahet deri në fund të presidencës franceze të këshillit”, ka thënë Santos në fjalimin e saj në Parlamentin Evropian.

Santos ka theksuar se që në relacionin për vitet 2019-2020 është bërë i qartë rekomandimi për hapjen e Konferencës së parë Ndërqeveritare.

“Tani kemi arritur pothuajse në mesin e vitit 2022 dhe Shqipëria vazhdon të presë”, u shpreh ajo.

Sipas saj vendi ynë pavarësisht mosreagimit nga Bashkimi Evropian, ka vazhduar të përparojë në rrugën drejt integrimit evropian.

“Është e qartë që Shqipëria dhe Maqedonia e Veriut duhet të bëjnë një rrugë të gjatë në procesin e reformave. Por kushtet për të mbajtur Konferencën e parë janë respektuar dhe procesi për Shqipërinë nuk duhet të jetë objekt i diskutimeve paralele, duhet të shkojë përpara”, ishte mesazhi dhe thirrja e Santos në Parlamentin Evropian.

Gjatë ditës së sotme u zhvillua një sesion i posaçëm për hapjen e negociatave për Shqipërinë dhe Maqedoninë e Veriut.

Aty theksohej se Maqedonia e Veriut është kandidati më i avancuar për sa i përket procesit të saj të anëtarësimit, dhe raporti i Komisionit për Punët e Jashtme thekson të dhënat pozitive të Maqedonisë së Veriut në tranzicionin e saj drejt demokracisë.

Megjithatë, Bullgaria vazhdon të bllokojë hapjen e negociatave të pranimit për shkak të një mosmarrëveshjeje kulturore, dhe raporti megjithatë i bën thirrje Maqedonisë së Veriut të vazhdojë reformën e saj administrative dhe politike.

Negociatat për anëtarësimin e Shqipërisë në BE nuk kanë filluar ende. Sipas raportit pozita ndërkombëtare e Shqipërisë për korrupsionin madje ka rënë që nga aplikimi i saj në BE në vitin 2014.

Raporti vjetor i Komisionit mbi progresin e Shqipërisë thekson çështjet e vazhdueshme të pavarësisë së gjyqësorit, korrupsionit, lirisë së fjalës dhe të drejtave të pakicave dhe u bën thirrje autoriteteve shqiptare që të eliminimi i korrupsionit dhe kriminalitetit në jetën publike.

Komisioni i Punëve të Jashtme të Parlamentit Evropian më 20 prill ka votuar me 66 vota pro, katër kundër dhe tre abstenime raportin e eurodeputetes Isabel Santos, mbi vlerësimin e Komisionit Evropian  për progresin e Shqipërisë në integrimin evropian gjatë vitit 2021.