Komunat kërkojnë shqyrtimin e kontratave kolektive – mbi 35 milionë euro ua morën

Asociacioni i Komunave të Kosovës, ka kërkuar nga Gjykata Komerciale që të shqyrtoj lëndën e kontratave kolektive në arsim dhe shëndetësi, përmes të cilave 26 komunave u ishin marrë mjetet financiare padrejtësisht.

Përmes një komunikate për media nga bordi është thënë se marrja e mjeteve nga komunat është duke vazhduar.

“Në gusht të vitit 2022, 26 Komuna kanë paditur Ministrinë e Arsimit, Shkencës, Tekonologjisë dhe Inovacionit si dhe Ministrinë e Shëndetësisë për kthimin e mjeteve financiere të marra padrejtësisht nga komunat për zbatimin e Kontratave Kolektive në arsim dhe shëndetësi”.

“Deri në gusht të vitit 2022 komunave iu janë marrë mbi 35 milion euro. Marrja e mjeteve është duke vazhduar”, thuhet në komunikatë.

Në rast të mos shqyrtimit të lëndëve nga komunat është theksuar se do të dëmtohen investimet në projektet kapitale duke arritur shumën prej 30 milionë euro.

“Bordi i Asociacionit të Komunave kërkon nga Gjykata Komerciale që të shqyrtoj këto lëndë sa më shpejtë meqë dëmi në autoritetet lokale është i përditshëm dhe në dëm të investimeve të projekteve kapitale”.

Nga komunat është thënë se këto padi janë bërë në Gjykatën Themelore në Prishtinë dhe të njëjtat më pas janë bartur për shqyrtim në Gjykatën Komerciale në Prishtinë.

“Siç dihet këto dy ministri në mënyrë të njëanshme patën lidhur Marrëveshje me Sindikatat respektive për zbatim të Kontratave Kolektive pa asnjë konsultim me Komunat e Kosovës”.

“Bordi i Asociacionit të Komunave të Kosovës rithekson se nuk është kundër Kontratave Kolektive por është kundër zbatimit të tyre në formën e deritashme duke ua marrë mjetet financiare komunave kur palë nënshkruese janë Institucionet qendrore”.

Gjithashtu, është thënë se kontratat janë nënshkruar pa asnjë konsultim paraprak me komunat.

“Pa vlerësim të ndikimit buxhetor, pa dakordim me Komunat dhe pa dijeninë e Komunave, derisa obligimet financiare të tyre kanë rënë tërësisht mbi Komunat dhe buxhetet e tyre”.

Më 6 prill, nga Asociacioni i Komunave të Kosovës, kanë kërkuar sërish që të barten të hyrat vetanake nga ministri i Financave, Punës dhe Transfereve, Hekuran Murati.

Para një dite, ministri i Financave, Punës dhe Transfereve Hekuran Murati ua kishte bartë komunave këto të hyra.

Të hyrat vetanake komunale të cilat janë mjete financiare që mblidhen nga taksat, tarifat, gjobat, pagesat për shërbimet publike të cilat pastaj dedikohen kryesisht vetëm për komunat dhe investimet në to, vitin e kaluar ishin marrë nga Qeveria e Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.