![](https://albanianpost.com/wp-content/uploads/2023/11/jmhmhmhmhmhmhmhmhmhmhmhmh.png)
Kompanitë e karburanteve fosile po investojnë dy herë më shumë në naftë dhe gaz sesa duhet nëse bota shpreson të kufizojë rritjen e temperaturave globale për të shmangur një katastrofë klimatike.
Në këtë përfundim ka dalë Agjencia Ndërkombëtare e Energjisë (IEA).
IEA ka thënë se sektori kishte ende një angazhim minimal me tranzicionin global të energjisë së pastër dhe vazhdoi të kontribuonte vetëm me 1 për qind të investimeve të energjisë së pastër globalisht.
Në një raport të posaçëm përpara bisedimeve të klimës Cop28 në Dubai, të cilat fillojnë më 30 nëntor, agjencia i bëri thirrje industrisë së naftës dhe gazit që të tregojë angazhim për të trajtuar ndotjen duke balancuar investimet e saj në energjinë e pastër dhe lëndët djegëse fosile.
Drejtori ekzekutiv i IEA, Fatih Birol, ka thënë se industria përballet me një moment të së vërtetës në të cilin duhet të marrë vendime për rolin e saj.
Nëse qeveritë përmbushin premtimet e tyre kombëtare për energjinë dhe klimën, atëherë kërkesa për lëndë djegëse fosile do të bjerë 45 për qind nën nivelin aktual deri në vitin 2050, sipas IEA.
Nëse politikat klimatike përshpejtohen për të përmbushur objektivin e kufizimit të ngrohjes globale brenda 1.5 gradë Celsius të niveleve të para-industrializuara, atëherë përdorimi i karburanteve fosile do të bjerë me më shumë se 75 për qind deri në vitin 2050.
Sipas Birol, kompanitë e naftës dhe gazit shpenzojnë rreth 2.5 për qind të kapitalit të tyre në teknologjitë e energjisë së pastër si energjitë e rinovueshme dhe karikimin e automjeteve elektrike, krahasuar me 97.5 për qind në zonat tradicionale të biznesit.
Dhe se ndarja duhet të jetë së paku 50 për qind për energjinë e pastër dhe se kompanitë duhet gjithashtu të ndërmarrin veprime për të ulur emetimet nga prodhimi i tyre i karburanteve fosile.
Kompanitë e naftës dhe gazit kanë raportuar të ardhura vjetore prej gati 3.5 trilion dollarësh në pesë vitet e fundit, sipas IEA.
Agjencia ka thënë gjithashtu se rreth gjysma e kësaj iu pagua qeverive dhe 40 për qind u kthyen në investime, duke lënë rreth 10 për qind për t’u kthyer te aksionerët ose për të përdorur për të paguar borxhin.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com