Kompania afrikano-jugore që ndihmon artistët në botën virtuale

Teksa artisti afrikano-jugor Fhatuwani Mukheli pikturon një portret të një gruaje në studion e tij në Johanesburg, ai nuk krijon vetëm veprën para tij.

Ai krijon, po ashtu, edhe një aset digjital të destinuar të zbukurojë një botë virtuale.

Mukheli përdor “The Tree”, një treg në internet për artistët e Afrikës së Jugut për të promovuar dhe shitur artin e tyre si NFT.

“Ka një botë virtuale ku njerëzit blejnë”, ka thënë ai duke iu referuar metaverse-it.

Ky i fundit është një realitet digjital tredimensional, për të cilin gjigantët e teknologjisë si Microsoft dhe Facebook thonë se është e ardhmja e internetit.

“Njerëzit kanë prona atje dhe arti juaj mund të jetë në ato mure”, ka vijuar artisti.

Klientët e Mukheli-t marrin si kanavacën aktuale, ashtu edhe NFT-në.

Kurse artistë të tjerë në “The Tree” shesin deri në pesë NFT në botim të kufizuar për secilën pjesë, të ngjashme me printimet digjitale.

Tanimë, Mukheli ka bërë mijëra dollarë duke përdorur platformën.

“Mendoj se është e rëndësishme si artist dhe krijues të luaj gjithmonë aty ku po shkon topi dhe jo domosdoshmërisht aty ku është”, ka thënë Trevor Stuurman, një nga katër artistët e tjerë që aktualisht shfaqin punën e tyre në “The Tree”.

Por, për kritikët, librat digjitalë të përdorur për të ruajtur informacionin nuk janë miqësor me klimën, sepse konsumojnë fuqinë kompjuterike.

Megjithatë, “The Tree” ka deklaruar se kursen energji duke funksionuar në Polygon, një blockchain që përdor një pjesë të fuqisë dhe kompenson çdo transaksion duke dërguar para te Greenpop, një organizatë mjedisore që mbjell pemë në të gjithë Afrikën Sub-Sahariane.

“Nuk ka të bëjë vetëm me artin, artistët dhe historinë, por ka të bëjë me sigurimin që kjo rritje e teknologjisë për artistët të mos sjellë kosto për planetin”, ka thënë Dan Portal, bashkëthemelues i “The Tree”.

Marrë nga “Reuters”, përshtatur për “Albanian Post”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.