Komiteti Evropian do vizitojë burgjet shqiptare për të shqyrtuar trajtimin e të ndaluarve

Komiteti Evropian për Parandalimin e Torturës dhe Trajtimit ose Ndëshkimit Çnjerëzor ose Degradues (CPT) ka shpallur programin e tij të vizitave të rregullta për vitin 2023.

Komiteti synon të shqyrtojë trajtimin e personave të privuar nga liria edhe në Shqipëri.

Vendet e tjera të përfshira në programin e vizitave do të jenë: Armenia; Qipro; Hungaria; Luksemburgu; Malta; Maqedonia e Veriut; Sllovakia.

CPT-ja organizon vizita në vendet e paraburgimit, për të vlerësuar se si trajtohen personat e privuar nga liria.

Këto vende përfshijnë burgje, qendra paraburgimi për të mitur, stacione policie, qendra mbajtjeje për të burgosurit e imigracionit, spitale psikiatrike, shtëpi të kujdesit social, etj.

Delegacionet e CPT-së kanë akses të pakufizuar në vendet e ndalimit dhe të drejtën për të lëvizur brenda vendeve të tilla pa kufizime.

Ata intervistojnë personat e privuar nga liria në mënyrë private dhe komunikojnë lirshëm me këdo që mund të japë informacion.

Pas çdo vizite, CPT-ja i dërgon një raport të detajuar shtetit në fjalë.

Ky raport përfshin gjetjet e komitetit dhe rekomandimet, komentet dhe kërkesat e saj për informacion.

Komitetit gjithashtu kërkon një përgjigje të detajuar për çështjet e ngritura në raportin e saj.

Këto raporte dhe përgjigje janë pjesë e dialogut të vazhdueshëm me shtetet përkatëse.

Vizitat kryhen nga delegacione, zakonisht të përbëra nga disa anëtarë të CPT-së, të shoqëruar nga anëtarë të stafit të Sekretariatit të Komitetit dhe, nëse është e nevojshme, nga ekspertë dhe përkthyes shtesë.

Delegacionet e komitetit kryejnë vizita në baza periodike (zakonisht një herë në katër vjet), por vizita shtesë “ad hoc” kryhen kur është e nevojshme.

Anëtarët e CPT-së janë ekspertë të pavarur dhe të paanshëm me prejardhje të ndryshme, duke përfshirë avokatë, mjekë dhe specialistë në çështjet e burgjeve ose të policisë.

Sekretariati i këtij institucioni është në varësi të Këshillit të Evropës.

Vetëvrasjet

Burgjet në Shqipëri kanë një nga nivelet më të larta të vetëvrasjeve në Evropë, krahas vendeve si Franca, Britania dhe Italia.

Kjo, sipas raportit të fundit të Këshillit të Evropës (SPACE I – 2021).

Raporti SPACE I – 2021, i publikuar gjatë kësaj jave, rendit 49 administrata të ndryshme burgjesh në të gjithë Evropën.

Më 31 janar të vitit 2021, në institucionet penale të Këshillit të Evropës ishin 1 milion e 414 mijë e 172 të burgosur.

Shkalla e vdekshmërisë në burgjet evropiane në vitin 2020 ishte 29 të burgosur për 10 mijë të tillë.

Ndërsa ajo e vetëvrasjeve ishte 5.7 të burgosur për 10 mijë të tillë.

Burgjet shqiptare dëshmuan 10 vetëvrasje për 10 mijë të burgosur.

Kjo statistikë e rendit Shqipërinë në vendet me shkallë shumë të lartë të vetëvrasjeve në burgje (25 për qind më e lartë se mesatarja evropiane).

Të dhënat kryesore

Raporti i KE-së zbulon se përqindja më e lartë e të burgosurve shqiptarë janë të dënuar për vrasje (32.9 për qind).

Vepra penale e drogës renditet në vend të dytë me 26.4 për qind të dënimeve të të burgosurve.

Ndërsa në vend të tretë renditen dënimet për vjedhje me 7.9 për qind.

Dënimet që rëndojnë më shumë mbi të burgosurit shqiptarët janë nga 5 deri në më pak se 10 vjet me 25.6 për qind.

Burgjet tona janë gjithashtu në kategorinë “shumë të lartë” për përqindjen e popullsisë së burgosur për 100 mijë banorë në vitin 2021.

Në Shqipëri kishte 162 të burgosur për 100 mijë banorë.

Kjo shifër krahasohet qartë me vendet e Evropës Veriore si Suedia (57) dhe Norvegjia (54), apo Italia (90) dhe Gjermania (71).

Në të kundërt, Hungaria ka 180 të burgosur për 100 mijë banorë, Polonia ka 179, Azerbajxhani 216 dhe Gjeorgjia 232.

Rusia kishte popullsinë më të lartë të të burgosurve: 328 për 100 mijë banorë.

Statistika të tjera

Përqindja e të burgosurve 50 vjeç e lart në popullatën e burgjeve shqiptare është 11.7 për qind.

Kjo është një shifër më e ulët se mesatarja evropiane.

Në shifra të rrumbullakosura, 95 për qind e të burgosurve të mbajtur në Evropë janë burra dhe vetëm 5 për qind janë gra.

Edhe pse ka dallime ndërmjet administratave penale, nënpërfaqësimi i grave në institucionet penale ruan një konstante në të gjithë Evropën.

Në vendet me të paktën 100 mijë banorë, përqindja më e lartë është 8.5 për qind në Letoni dhe më e ulëta me 1.3 për qind në Shqipëri.

Përqindja e të burgosurve të huaj në burgjet shqiptare është vetëm 2.4 për qind.

Të burgosurit që nuk vuajnë dënimin përfundimtar në Shqipëri zënë pjesën më të madhe me 50 për qind.

Vendi ynë ka një punonjës burgu për secilin të burgosur, sipas raportit të KE-së.

Kjo statistikë, shton institucioni evropian, është shumë e ulët, në krahasim me mesataren evropiane.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.