Në mënyrë që vendet evropiane të marrin rol konkurrues në fushën e teknologjisë, Komisioni Evropian ka njoftuar tre projekte lidhur me teknologjinë e dronëve, komunikimin hapësinor dhe menaxhimin e trafikut hapësinor.
Agjensia e lajmeve, Reuters, shkruan se ky angazhim i Komisionit Evropian ka marrë emrin “Plani i Veprimit për Sinergjitë”. Ai do të jetë ndërmjet Industrive të hapësirës dhe mbrojtjes civile.
Synimi i planit është të shfrytëzojë kërkimin dhe inovacionin në të tre sektorët e projekteve teknologjike dhe sipërmarrjeve të tyre.
Sipas Reuters, ekzekutivi i Bashkimit Evropian ka deklaruar se projekti i dronit do të forcojë aftësinë konkurruese të industrisë në aspektin teknologjik. Ndërsa për komunikimin hapësinor, pretendohet se do të sigurojë një lidhje me shpejtësi të lartë dhe të qëndrueshme në Evropë.
Për sa i përket menaxhimit të trafikut hapësinor, ai do të jetë i nevojshëm për të shmangur përplasjet që rezultojnë nga përhapja e satelitëve dhe mbeturinave hapësinore.
“Ideja është që inovacionet të arrijnë sistematikisht përdorime të shumëfishta përmes dizajnit. Dhe për të lejuar shfrytëzimin e potencialit të madh të studjuesve dhe bizneseve të inovacionit”, ka thënë Margrethe Vestager, shefja digjitale evropiane.
Nga ana tjetër, komisioneri i industrisë në BE, Thierry Breton, ka thënë se projektet do të ndihmonin bllokun e 27 vendeve të qëndronin me këmbët e veta dhe mos të mbështeteshin te të tjerët.
“Kjo do të zvogëlojë varësinë tonë në teknologjinë kritike dhe do të rrisë udhëheqjen industriale që na duhet për të ridalë nga kriza”, dalloi ai në kuadër të krizës së shkaktuar nga pandemia e coronavirus-it.
Albanianpost.com
