Shqipëria

Kolegji Zgjedhor rrëzon kërkesën e PD-së për Qarkun e Fierit


Kolegji Zgjedhor ka rrëzuar ankimimin e Partisë Demokratike (PD) ndaj vendimit të Komisionit të Ankesave (KAS), për rezultatin e zgjedhjeve të 25 prillit në Fier.

PD-ja e çoi çështjen në Kolegjin Zgjedhor, pasi kërkoi përsëritjen e zgjedhjeve, me pretendimin se ka pasur parregullsi nga ana e Partisë Socialiste.

Sipas anëtarëve të Kolegjit, kërkesa e PD-së është e pabazuar në prova dhe në ligj.

Më herët, Kolegji ka rrëzuar kërkesën e Partisë Demokratike dhe Lëvizjes Socialiste për Integrim për paraqitjen e provave shtesë për shpalljen e pavlefshmërisë së zgjedhjeve në Qarkun e Beratit, Gjirokastrës, Vlorës, Tiranës dhe Shkodrës.

Kërkesat e PD-së kanë qenë kryesisht, ankimime, kërkesa për prova shtesë dhe përsëritje të zgjedhjeve.

Tanimë ka mbetur vetëm një qark për tu shqyrtuar, ai i Elbasanit.

Pse u rrëzuan kërkesat e PD-së dhe LSI-së në qarqet e ndryshme?

Kolegji Zgjedhor ka rrëzuar ankimimin e PD-së ndaj KAS-it për rezultatin e zgjedhjeve të 25 prillit në Shkodër.

Ajo nuk pranoi as kërkesën e LSI-së për shtyrjen e seancës.

Nga ana tjetër, kërkesat për Tiranën u rrëzuan pasi sipas Kolegjit ishte e pambështetur në ligj dhe prova.

Kolegji Zgjedhor rrëzoi më 4 qershor kërkesën e PD-së dhe LSI-së për paraqitjen e provave shtesë për shpalljen e pavlefshmërisë së zgjedhjeve në qarkun e Beratit.

LSI-ja pretendonte mandatin e saj të parë në Berat pasi diferenca me Partinë Socialiste ishte 77 vota.

Pse u ankimua Berati?

Rezultati i qarkut Berat në zgjedhjet e 25 prillit ka qenë shumë i ngushtë. Pak vota në kutitë e fundit i dhanë PS-së mandatin e pestë, duke lënë jashtë ulëseve të Kuvendit LSI-në.

Këta të fundit, në zgjedhjet e vitit 2017, kishin marrë dy mandate kundrejt katër të socialistëve dhe një të demokratëve.

Në zgjedhjet e reja, LSI-ja mbeti tërësisht jashtë Parlamenti në këtë qark – bastion të socialistëve të qendrës, në të cilin është lindur edhe kreu historik i tyre, Presidenti aktual i Shqipërisë, Ilir Meta.

Nga LSI-ja u hodhën akuza për manipulim të votave në këtë qark, me qëllim djegien e qëllimshme të mandatit të tyre.

Pikërisht për këtë fakt, ata e ankimuan në KAS dhe Kolegjin Zgjedhor qarkun.

/Albanianpost.com

Lajmet kryesore