“Koeficienti i pagave shton varfërinë e qytetareve, duhej të ishte 132 euro” – ekonomistët për Ligjin e ri të Pagave

“Kjo diferencë negative e shton në masë te madhe varfërinë e qytetarëve”, kanë komentuar ekonomistët për Albanian Post vlerën e koeficientit prej 105 euro për paga në sektorin publik, derisa thonë se koeficienti do të duhej të ishte 132 euro për të qenë në harmoni me propozimin e Qeverisë për pagë minimale.

Ekonomisti Shyqyri Bytyqi, thotë për AP se vendimi i qeverisë për paga të ulëta në sektorin publik do të thotë rritje e dyfishtë e kostos së jetesës, kjo për shkak të uljes së të ardhurave të tyre dhe agresivitetit të inflacionit në ketë periudhë.

“Kjo diferencë negative e shton në masë te madhe varfërinë e qytetarëve tanë, duke e vënë në pikëpyetje mirëqenën e tyre. Tani me vendimin e ri për koeficientin për paga pasiguria sociale është rritur akoma më shumë”, deklaron Bytyqi.

Ai theksoi se Qeveria kishte mundësi t’ua rriste pagat më shumë punonjësve të sektorit publik, meqë kishte suficit në shumë vija buxhetore.

“Rritjet e të hyrave buxhetore që kanë ndodhur në vitin e fundit si dhe suficiti në shume vija buxhetore i mundëson qeverisë që me një qasje me pro zhvillimore do ta përballonte rritjen e pagave, rritje që do të ndikonte në rritjen e mirëqenies së qytetarëve, mirëqenie tashmë e goditur rëndë”.

Mbi 83 mijë punëtorë nuk e dinë sa do e kanë pagën, Qeveria ka vendosur ta mbajë sekret vlerën e koeficientit

Edhe për ekonomistin Erton Bega, ky koeficient nuk është i mjaftueshëm për t’i përballuar rritjes së madhe të inflacionit në Kosovës, meqë në tremujorin e dytë të 2022, inflacioni arriti nivelet më të larta që nga mesi i vitit 2008.

“Koeficienti duhej të ishte 132 euro për të qenë në harmoni me propozimin e qeverisë për pagë minimale, për të evituar gabimet e shtetit me ligjin e mëhershëm të pagave dhe për të trajtuar drejtë pasojat e zhvillimeve ekonomike pas inflacionit të lartë në dy vitet e fundit”, shpjegon Bega për Albanian Post.

“Unë mendoj që për këto pozita masive të sektorit të arsimit, të sektorit të shëndetësisë, të sigurisë, koeficienti prej 130 euro do të ishte i duhuri, marrë parasysh edhe zhvillimet në vitet e fundit”, shton ai.

Nga 120 sa ishte vlera e koeficientit për paga në sektorin publik, Qeveria e Kosovës me Ligjin e ri e ka ulur në 105, çka nënkupton paga më të vogla për mijëra punonjës të administratës së shtetit në të gjithë sektorët.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.