Klinaku kërkon nga policia ta ruajë objektin e OVL-UÇK

Ushtruesi i detyrës së kryetarit të Organizatës së Veteranëve të Luftës së Ushtrisë Çlirimtare të Kosovës, Faton Klinaku, përmes një letre ka kërkuar nga Policia e Kosovës që ta ruajë objektin e Organizatës e Veteranëve të Ushtrisë Çlirimtare të Kosovës.

Kjo kërkesë e Klinakut, vjen pasi gjyqtarit të Speciales iu vodh laptopi me të dhëna sensitive.

“Siç jeni të informuar, në objektin e Organizatave të dala nga lufta e UÇK-së, në rrugën e UÇK-së në Prishtinë, ka pasur zhvillime rreth dosjeve të Gjykatës Speciale me seli në Hagë, thënë më konkretisht, një person i maskuar për tri herë me radhë i ka sjellur ato dosje në Organizatën e Veteranëve të Luftës së UÇK-së, gjë që për këtë, për më shumë se dy vite, në mënyrë të pafajshme po mbahen në paraburgim krerët e Organizatës sonë”, thuhet në letrën e Klinakut drejtuar Policisë.

Ai ka kërkuar nga ky institucion që të marr masat e nevojshme.

“Siç është paraqitur në mediat tona e që e ka publikuar një gazetë franceze, ka pasur grabitje në Paris dhe i është vjedhur laptopi një gjyqtari të Speciales me të dhëna sensitive, prandaj kërkojmë nga ju që të merrni masat e duhura për ta ruajtur objektin apo hyrjen e ndërtesës sonë, me qëllim që të mos përsëriten ngjarjet e shtatorit të vitit 2020”.

Gjykata Speciale ka refuzuar të komentojë shkrimin në gazetën franceze Le Journal du Dimanche, ku thuhet se një gjyqtari të Dhomave të Specializuara në Hagë i është vjedhur një llop-top me materiale të ndjeshme që kanë të bëjnë me Gjykatën Speciale.

“Dhomat e Specializuara të Kosovës nuk do ta komentojnë raportimin në median për të cilën keni shtruar pyetje”, është thënë një përgjigje të shkurtër për Albanian Post nga zëdhënësja Angela Griep.

Sipas francezes së përjavshme Le Journal du Dimanche, është bastisur një apartament në Paris, pronë  e një gjyqtari të lartë të Gjykatës Speciale.

Bastisja, kishte shkruar se ka ndodhur në fillim të janarit.

Sipas JDD-së (shkurtesa e gazetës) hajdutët kanë hyrë në këtë apartament, por ata nuk kanë prekur asgjë tjetër, pos kanë marrë llop-topin me materiale.