Kina rrit përpjekjet për zero-COVID, ekspertët paralajmërojnë dëme ekonomike

Kina ka intensifikuar përpjekjet propagandistike për të fituar mbështetjen për politikën “zero-COVID”.

Por ekspertët paralajmërojnë për goditjen e rëndë ekonomike nga bllokimet e zgjatura.

Atje, agjencia zyrtare e lajmeve Xinhua publikoi një artikull, me anë të të cilit paralajmëronte se sistemi mjekësor i vendit rrezikonte në rast të një shpërthimi masiv.

Ai u bëri jehonë komenteve të Presidentit Xi Jinping, i cili u ka bërë thirrje qytetarëve që të “kapërcejnë vetëkënaqësinë në përgjigje ndaj mutacionit të virusit”.

“Pandemia globale është ende e rëndë, kështu që nuk mund të qetësojmë kontrollet tani”, ka pohuar ai.

Ky vendim për të rritur masat për të luftuar përhapjen e variantit shumë infektiv qëndron në kontrast të dukshëm me pjesën më të madhe të botës, e cila po mëson të jetojë me virusin.

Analisti Bo Zhuang ka thënë se qeveritë lokale po “nënvlerësojnë jashtëzakonisht shumë” dëmin ekonomik të shkaktuar nga bllokimet, të cilat kanë ndërprerë rrjetet logjistike dhe lidhjet ndërqytetëse që mundësojnë rrjedhën e mallrave.

“Ekonomia e Kinës mbështetet në zinxhirët e furnizimit”, ka thënë Zhuang.

Sipas tij, disa prodhues të automjeteve elektrike, përfshirë Tesla-n, kanë pezulluar prodhimin sepse nuk mund të merrnin komponentë.

Shanghai, qendra e shpërthimit më të madh të virusit në Kinë që nga fillimi i pandemisë në Wuhan në fillim të vitit 2020, raportoi 27 mijë e 719 raste të mërkurën.

Në fund të marsit, autoritetet vendosën një bllokim me dy faza që u zgjerua për të përfshirë të gjithë qytetin prej 26 milionë banorësh.

Sakaq, një zyrtar i afërt me Qendrën e Kinës për Kontrollin dhe Parandalimin e Sëmundjeve ka shprehur shqetësimin për forcimin e kontrolleve në sistemin e kujdesit shëndetësor.

“Nga pikëpamja mjekësore, nuk mendoj se politika zero-COVID është më e zbatueshme. Shanghai-t po i mungojnë profesionistët mjekësorë për të matur rezultatet e testeve dhe shtretërit për të akomoduar pacientët”, ka thënë zyrtari.

Për të, zgjidhja e vetme për të mos jetuar me COVID-19 është rreptësia.

Marrë nga “Financial Times”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.