Kica-Xhelili pas zgjedhjes nënkryetare e LDK-së: E nderuar, faleminderit Abdixhikut që pa në mu atë që unë pash në këtë familje

“E nderuar”, ka filluar shkrimin e saj falënderues Doarsa Kica-Xhelili, pasi që në mbledhjen Këshillit të Përgjithshëm të Lidhjes Demokratike të Kosovës (LDK), është votuar si nënkryetare e kësaj partie.

Përmes një postimi në Facebook, Kica-Xhelili tha se “të them vetëm ‘Faleminderit’, sikur zbut madhështinë e raportit që kam krijuar me LDK dhe njerëzit e mirë të saj”.

Falënderimet e saj, deputetja e filloi ndaj kryetarit të LDK-së, Lumir Abdixhiku, “që pa në mua atë që unë pashë në këtë familje”, sipas saj, “besim reciprok për qëllimet më fisnike”.

LDK, në vlerësimin e Kica-Xhelilit, “është familje e natyrshme politike”.

Kjo histori, pohoi ajo, “pavarësisht që ka rrugë të pabërë ende, e ka një fillim – shtyllë, të ndërtuar mbi besim reciprok në kohë të vështirë, dhe kohërat e vështira gjithmonë zbulojnë karakterin real të një raporti”.

“Ju faleminderit dhe një herë për besimin”, përfundoi nënkryetarja e sapozgjedhur e LDK-së.

Ndërsa, Kryetari i LDK-së, Lumir Abdixhiku, pas zgjedhjes së kryesisë së re të kësaj partie në mbledhjen e Këshillit të Përgjithshëm që u mbajt këtë të shtune, ka thënë se është i bindur se e njëjta do të shërbejë mbarë.

“Jam i bindur se kjo Kryesi, me 16 doktorë shkencash, me 10 magjistra, me kryetarë komunash, deputetë e kryetarë degësh, me veprimtarë të të gjitha gjeneratave, do të shërbejë drejtë, do të shërbejë mbarë, do të shërbejë djathtë, drejt fitores sonë të madhe”, shkroi Abdixhiku në Facebook.

Ai bëri me dije se kryesia e re është zgjedhur me unanimitet votash e më mbështetje të plotë nga të gjithë anëtarët e Këshillit të Përgjithshëm, derisa theksoi se me këtë përzgjedhje “përcaktuam dhe fatin tonë vendimmarrës për 4 vitet e ardhshme”.

“Në diskutimet tjera mbi tre orëshe në Këshill, vendosëm për ndarjen e përgjegjësive regjionale për secilin anëtar të Këshillit; sikurse dhe nisjen e hartimit të listës së kandidatëve për deputetë që nga tani”, shtoi.

Do të jemi në terren, njoftoi kreu i LDK-së, “në çdo anë; do të jemi me qytetarët tanë në Kosovë e në mërgatë”, sepse, siç pohoi lideri i opozitës, “koha jonë po vjen”.

“Sepse ‘Rruga e re’ ka nevojë për secilin prej nesh”.

Në kryesinë e re të LDK-së, pos kryetarit Abdixhiku, do jenë edhe nënkryetarët Anton Quni, Hykmete Bajrami, Doarsa Kica Xhelili, Gazmend Muhaxheri dhe Lutfi Haziri.

Në këtë kryesi gjenden edhe sekretarët e kësaj partie, si Imri Ahmeti (Sekretar i Përgjithsshëm) dhe Sokol Haliti (Sekretar i Degëve Jashtë), por edhe kryetarët e forumeve si Jehona Lushaku Sadriu (Kryetare e Forumit të Gruas) dhe Paris Guri (Kryetar i Forumit Rinor të LDK-së).

Pos këtyre, në kryesinë e re të LDK-së janë edhe Alban Zogaj, Alush Gashi, Arben Gashi, Ardian Shala, Armend Zemaj, Avdullah Hoti, Besian Mustafa, Besnik Osmani, Berat Rukiqi, Besa Gaxherri, Bexhet Xheladini, Doruntinë Maloku, Driton Selmanaj e Ekrem Hyseni.

Po ashtu, pjesë e listës së kryesisë së re është edhe Ema Nikçi Rexha, Florian Dushi, Izet Sadiku, Kujtim Shala, Mirjeta Kalludra, Muhamet Hamiti, Ruzhdi Shehu, Rrezarta Krasniqi, Sibel Halimi, Shkëmb Manaj, Visar Berisha, Visar Azemi, Vlora Dumoshi, Xhafer Gashi dhe Xhafer Tahiri.

Më 19 nëntor, me 333 vota pro, Lumir Abdixhiku ishte zgjedhur sërish në krye të Lidhjes Demokratike të Kosovës (LDK), derisa në sallë prezentë kishin qenë 333 delegatë, nga 335 sa gjithsejtë i ka LDK-ja.

Pas rizgjedhjes si kryetar i partisë, Abdixhiku kishte theksuar se do ta ushtrojë këtë detyrë e ketë përgjegjësi me “sjellje rugoviste”.

“Ju faleminderit të gjithëve për këtë nder dhe përgjegjësi të jashtëzakonshme që ma dhatë sot. Unë tani kam një fjalë të përgatitur në konventën madhështore që do të mbahet me fillim nga ora 17:00 dhe do t’u kursej këtë kohë tani. Do të ushtrojë këtë detyrë e këtë përgjegjësi me sjellje rugoviste në besim në LDK, në besim në anëtarësinë tonë”, tha Abdixhiku.

Abdixhiku ishte kandidati i vetëm për kryetar të LDK-së, pasi Faton Bislimit nuk iu aprovua kandidatura nga kryesia e partisë.

Gjatë mbledhjes së Kuvendit është miratuar programi “Rruga e Re” që është paraqitur nga kryetari i rizgjedhur i LDK-së, Lumir Abdixhiku.

Programi ishte votuar pro nga 333 delegatë sa ishin në sallë. Në më shumë dy vjet në krye të LDK-së, suksesi më i madh i Abdixhikut dhe ekipit të tij, janë zgjedhjet lokale, të mbajtura në nëntor të vitit 2021.

Nën drejtimin e Abdixhikut, LDK kishte arritur që t’i fitonte plotë 8 komuna, përfshirë kryeqytetin, Prishtinën.

Abdixhiku ishte zgjedhur kryetar i LDK-së më 14 mars të vitit 2021, pas zgjedhjeve të jashtëzakonshme të kësaj partie.

Këto zgjedhje në këtë parti, kishin ardhur pas dorëheqjes së Isa Mustafës – si marrje e përgjegjësisë për rezultatin e katastrofal në zgjedhjet parlamentare të 14 shkurtit.

Abdixhiku kishte arritur që në garën me Lutfi Hazirin të marrë besimin e shumicës së delegatëve të kësaj partie. Ai kishte marrë 191 votave të 328 delegatëve të këtij kuvendi. Zgjedhja e kryetarit të LDK-së ishte bërë me vota të fshehta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.