Këshillimi Kombëtar e kalon shifrën e 36 mijë plotësimeve online, Rama: Mbi 1 mijë përgjigje të kthyera me postë

Kryeministri i Shqipërisë, Edi Rama, ka deklaruar për herë të parë se nga pyetësori që është dërguar në shtëpitë e shqiptarëve janë kthyer me postë mbi 1 mijë përgjigje.

Në vijim të nismës së tij të kurorëzuar “Këshillimi Kombëtar”, Rama bëri të ditur se online janë plotësuar mbi 36 mijë pyetësorë.

“Le të vazhdojmë të dëgjojmë njëri-tjetrin si shqiptarë, si qytetarë, si njerëz, për shtëpinë tonë Shqipërinë”, thekson ai në postimin e bërë publik në median sociale Facebook.

Ndërkohë ai e ka mbyllur duke ironizuar situatën politike me kundërshtarët e tij të Partisë Demokratike.

“Le të marrim vendimet e duhura për të nesërmen, teksa politika zhurmon nga bravat, qysqitë, sharjet e përçarjet për llogari të atyre që nuk kanë më asgjë për t’i dhënë Shqipërisë”, përmbyllet mesazhi i tij për “Kuvendimin Popullor”.

Si nisi?

Nisma e Këshillimit Kombëtar është fjala kyçe për Qeverinë e Shqipërisë në fillimin e vitit 2022, pasi u paralajmërua nga vetë Rama, në fund të 2021-shit.

Nën moton “Le të dëgjojmë njëri-tjetrin”, Rama ka ftuar herë pas here qytetarët që të bëhen pjesë e këtij procesi.

Duke qenë se ai mund të kryhet edhe online, ftesat e tij vijnë në formën e postimeve, duke nxjerrë pyetje të caktuara, të cilat janë pjesë e Këshillimit.

Duhet theksuar fakti se në këtë proces mund të marrë pjesë çdo qytetar adult i vendit, duke dhënë mendime mbi çështje të caktuara.

Gjithsesi, metodologjia e përgjigjeve nuk është ajo e atyre të hapura, për të dhënë mendim, sa ajo e përzgjedhjes konvencionale, mes tri alternativash.

Përpos të tjerave, vetë pyetësori mbetet në kuadër të anonimatit dhe nuk kërkon të dhëna personale. Por, nga i njëjti motor kërkimi, nuk mund të plotësohet më shumë se një herë.

Kjo është edhe mënyra se si është kërkuar të shmangen mendimet e shumëfishta nga një person i vetëm.

Mbi çfarë?

Janë 12 çështjet mbi të cilat qytetarët pyeten për sa i përket Këshillimit Kombëtar dhe jashtë kuadrit të tyre nuk mund të dilet.

Parimisht, shumica e tyre luajnë me dualitetin e çështjeve, duke propozuar një opsion dhe duke pyetur nëse personi është apo jo me të njëjtin mendim me pohimin.

Po ashtu, ka edhe një kuti për ata që nuk duan të gjykojnë mbi një çështje të caktuar.

Ato më interesantet, mbeten disa, në rrafshe të gjerë.

Prej tyre, spikat pyetja nëse kultivimi i kanabisit duhet ose jo të lejohet, me qëllim përdorimin e produktit për qëllime mjekësore. Gjithnjë, në një proces të kontrolluar nga shteti.

Po ashtu, pyetje me rëndësi lidhen edhe me politikën e jashtme të vendit. Fakti nëse Shqipëria duhet ose jo të ndahet nga Maqedonia e Veriut për integrimin evropian apo dobinë e nismës “Open Balkan”, janë pjesë e anketimit publik.

Një pikë interesante është edhe aplikimi i paraqitjes së certifikatës së vaksinimit në hapësira publike të mbyllura.

Shqipëria këtë masë momentalisht e ka vendosur vetëm për administratën shtetërore, supermarketet dhe qendrat tregtare.

Masat ndaj evazionit fiskal, janë po ashtu çështje me rëndësi në pyetësor. Mbi të gjitha, kur një paralajmërim i hapur është bërë nga vetë kryeministri, pas rrjedhjes së të dhënave të pagave për qindra mijëra qytetarë.

Një vend e zë dhe ndotja publike, apo procesi i vetting-ut tek pushteti legjislativ.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.