“Kërkojmë miratimin e SHBA-ve për përdorimin e vaksinës anti-COVID Pfizer edhe te fëmijët nën 5 vjeç”

Nga kompania farmaceutike, Pfizer, kanë bërë me dije se do të kërkojnë “autorizim urgjent në SHBA” për vaksinën COVID-19 te fëmijët nën moshën 5 vjeç.

Kjo, pasi nga rezultatet e përkohshme klinike ka rezultuar se vaksina është e sigurt dhe shumë efektive.

Prodhuesi amerikan i barnave të hënën tha se tri doza të injektimit të fëmijëve të saj – secila rreth një e dhjeta e madhësisë së një doze të rritur – prodhoi një përgjigje të fortë imune me një profil të favorshëm sigurie të ngjashme me një placebo – një pilulë, ilaç ose procedurë e padëmshme e përshkruar më shumë për përfitimin psikologjik të pacientit, sesa për ndonjë efekt fiziologjik – për grupmoshën.

Një autorizim do të hapte tregun e fundit të madh për vaksinën anti-COVID, për një rrjedhë më të gjatë të të ardhurave nëse do të bëhej pjesë e protokollit mjekësor të imunizimit të fëmijërisë.

Tregu i vaksinave COVID-19 ka kaluar me shpejtësi nga mungesa në tepricë në vitin 2022, pasi kompanitë farmaceutike zgjeruan prodhimin dhe përhapja e vaksinave në vendet në zhvillim rezultoi më e ngadaltë se sa pritej.

“Airfinity”, kompani analitike shëndetësore, uli parashikimet e saj për shitjet e të gjitha vaksinave kundër COVID-19 këtë vit me 20 për qind në 64.1 miliardë dollarë.

Por prindërit amerikanë kanë qenë ndër më të zëshmit për dëshirën e tyre për t’i vaksinuar fëmijët më të vegjël.

Nga Pfizer u tha se të dhënat do të ndahen këtë javë me Administratën Amerikane të Ushqimit dhe Barnave, e cila pritet të marrë në konsideratë nëse do të autorizojë injektimet e para COVID për foshnjat, të vegjlit dhe fëmijët parashkollorë muajin e ardhshëm.

Paraqitjet tek autoritetet e tjera rregullatorë, përfshirë Bashkimin Evropian, do të pasojnë së shpejti, tha kompania.

Pfizer, e cila zhvilloi vaksinën e saj kundër COVID me partnerin gjerman BioNTech, vonoi një aplikim për autorizim urgjent për fëmijët parashkollorë dhe më të vegjël në shkurt, për shkak të shqetësimeve se një regjim me dy doza nuk prodhoi një përgjigje mjaft të fortë imune.

Rivalja e saj Moderna u ka kërkuar tashmë rregullatorëve në SHBA dhe BE që të autorizojnë vaksinën e saj për fëmijët nën moshën gjashtë vjeç.

Pfizer tha se 1 mijë e 678 fëmijë kishin marrë një dozë të tretë të vaksinës së saj në provën klinike të fazës së vonë.

Efikasiteti i vaksinës, prej pak më shumë se 80 për qind, u vu re në një analizë përshkruese, e cila bazohej në dhjetë raste simptomatike COVID të identifikuara shtatë ditë, pasi u administrua një e treta, sipas Pfizer.

Albert Bourla, shefi ekzekutiv i Pfizer-it, tha se të dhënat përfundimtare të efikasitetit do të ndahen kur të bëhen të disponueshme.

Prova u krye, ndërsa Omicron ishte varianti më i përhapur i coronavirus-it, duke e bërë të vështirë krahasimin me provën origjinale të fazës tre për të rriturit.

Ugur Sahin, shefi ekzekutiv i BioNTech, tha se studimi sugjeroi që doza më e ulët “u siguron fëmijëve të vegjël një nivel të lartë mbrojtjeje kundër prejardhjeve të fundit Covid-19”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.