Kërkohet dorëheqja e drejtorit të Gjinekologjisë, “foshnja ka mundur të shpëtojë”

Sindikata e Punëtorëve Shëndetësor të Qendrës Klinike Universitare të Kosovës (QKUK), ka kërkuar dorëheqjen e drejtorit të gjinekologjisë, Zef Ndrejajt, pasi sipas tyre foshnja ka mundur të shpëtojë në rastin e vrasjes së nënës shtatzënë, H.M, të mërkurën.

Përmes një komunikate për media kjo sindikatë ka sqaruar që Kodi i Etikës e lejon që të kryhet një intervenim i tillë në aso kushte.

“Leni pallavrat dhe shfajësimet, nuk janë kërkuar kushte aseptike operative për ta nxjerrë foshnjën pasi nëna ka qenë e pa jetë, një skalper është dashur. Kaq. CTG-ja ka qenë literalisht dhe figurativisht 30 metra larg viktimës, me çka do ishte konstatuar urgjentisht se a është foshnja gjallë apo jo”.

“Përveç kësaj, Kodi i Etikës e lejon një intervenim të tillë në momentin që konstatohet vdekja e nënës dhe që foshnja është gjallë”, sqarohet nga kjo sindikatë.

Të njëjtit kanë thënë se nuk ka pasur nevojë për mbulimin e nënës së vrarë, “mirëpo për neve si profesionist shëndetësor”.

Ndërsa, për dorëheqjen e drejtorit të Gjinekologjisë kanë thënë se duhet të jap dorëheqje sa më shpejt.

“Drejtori i Gjinekologjisë urgjent duhet të dorëhiqet nëse ka sado pak moral, nëse nuk ka fije turpi dhe as moral, të shkarkohet menjëherë”.

Vrasja e gruas shtatzënë brenda QKUK-së

Lajmin për Albanian Post e kishte konfirmuar zëdhënësja e Policisë për rajonin e Prishtinës, Flora Ahmeti.

“Rreth orës 18:00, kemi pranuar informatën për një trup të pajetë, në oborrin e QKUK-së në Prishtinë. Policia menjëherë ka dalë në vendin e ngjarjes si dhe ekipi mjekësor të cilët kanë konstatuar vdekjen  e viktimës, femër, rreth 35 vjeç”.

Ahmeti ka sqaruar se mbështetur në informacionet e para, dyshimet e ngritura sugjerojnë se bëhet fjalë për vrasje.

Ndërsa kishte shtuar se policia është në vendin e ngjarjes dhe hetimet kanë nisur.

“Aktualisht policia në koordinim me prokurorin e shtetit ka nisur një hetim dhe po vijon ndërmarrjen e të gjitha veprimeve hetimore dhe të ekzaminimit, me qëllim  sqarimin e plotë të ngjarjes”.

Nuk dihen zyrtarisht akoma motivet e vrasjes, por siç ka kuptuar Albanian Post nga burime brenda QKUK-së, vrasja ka ndodhur pas përfundimit të kontrollës së viktimës nga mjekët.

Dorasi vazhdon të jetë në arrati, kurse Inspektorati Policor i Kosovës (IPK), ka konfirmuar për Albanian Post se ka filluar një hetim ndaj policëve të cilët janë angazhuar për grumbullimin e informacioneve në këtë rast.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.