Këngëtarja Enca Haxhia i shpëton “arrestit me burg”

Gjykata e Shkallës së Parë Tiranë ka vlerësuar si të ligjshëm arrestimin në flagrancë të këngëtares Enca Haxhia.

Por Gjykata nuk ka pranuar ankimin e Prokurorisë për caktimin e masës të “arrestit në burg”, pasi Prokuroria hoqi dorë nga ankimi.

Sakaq, kërkesa e këngëtares për ta vlerësuar të paligjshëm arrestimin është rrëzuar, pasi ankimi është ushtruar jashtë afatit ligjor.

Ajo u arrestua nga policia gjatë operacionit policor të koduar “Balcony”, për goditjen e veprimtarisë kriminale të kultivimit të bimëve narkotike, ku rezultoi se kishte kultivuar bimë narkotike, në vazo, në ballkonin e banesës së saj.

Gjatë kontrollit në banesën e 27-vjeçares, në ballkon, shërbimet e Policisë gjetën dhe sekuestruan në cilësinë e provës materiale, bimë të dyshuara narkotike kanabis.

Pas arrestimit, këngëtarja ka thënë se është përdoruese dhe e ka për përdorim vetjak.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.