Kearns: Ngjarjet në veri konfirmojnë dështimin e politikave që kënaqin autokratët

Kryetarja e Komitetit për Punë të Jashtme në Parlamentin e Britanisë së Madhe, Alicia Kearns, nëpërmjet një postimi në llogarinë e saj në platformën “X”, tha se ngjarjet e fundit në pjesën veriore të Kosovës të banuar kryesisht me serbë etnikë, ilustrojnë më së miri dështimin e politikave që për synim kanë t’i kënaqin autokratët.

Kearns, duku iu referuar sulmit terrorist të 24 shtatorit ndaj Policisë së Kosovës nga një bandë e organizuar në hyrje të fshatit Banjskë të Zveçanit – komunë e banuar me shumicë serbe – ku u vra një rreshter dhe dy të tjerë u plagosën, theksoi se “realiteti i tmershëm” në veri të Kosovës nxjerr në pak shumë gabime të bashkësisë së organizuar ndërkombëtare.

“Realiteti i tmerrshëm i ngjarjeve të kësaj fundjave në Kosovë është se ato konfirmojnë frikën tonë më të keqe, justifikojnë shqetësimet që kemi ngritur dhe nxjerrin në pah kaq shumë nga gabimet, papërshtatshmëritë dhe dështimet në parandalim të lehtësuara nga politikat aktuale të nxitjes ndaj autokratëve”, shkroi deputetja britanike.

Kearns ka qenë njëra ndër nismëtaret kryesore të letrës së shefave të komiteteve parlamentare për politikë të jashtme, drejtuar niveleve më të larta diplomatike në Uashington, Bruksel dhe Londër, ku kërkohej një qasje më e ashpër dhe më e vendosur ndaj Serbisë dhe po ashtu, rikthimin e ekuilibrit dhe proporcionalitetit në dialogun Prishtinë-Beograd.

Në një video të publikuar të martën nga Policia e Kosovës, shihet edhe nënkryetari i Listës Serbe – partia më e madhe e serbëve të Kosovës – Milan Radojiçiç, duke udhëhequr terroristët që sulmuan Policinë e Kosovës, të dielen e 24 shtatorit, ku për pasojë u shua jeta e rreshterit Afrim Bunjaku, tashmë i nderuar me titullin ‘Hero i Kosovës’.

Pjesëtarët e këtij grupi, përfshirë kryekriminelin Radojçiç, pas vrasjes së policit kosovar në krye të detyrës dhe plagosjes së dy policëve të tjerë, gjetën strehë në Manastirin e Banjskës, ku u barrikaduan për orë të tëra dhe shkëmbyen të shtëna me organet e rendit gjatë gjithë ditës së dielë, duke tentuar të provokonin kryengritje më të gjërë.

Radojçiçi i cili ka mbështetjen e presidentit serb dhe autoriteteve në Beograd, kërkohet nga Qeveria e Kosovës dhe është gjithashtu në “listën e zezë” të Shteteve të Bashkuara të Amerikës (SHBA) dhe Britanisë së Madhe për përfshirje në krimin e organizuar ndërkombëtar.

Terroristët që cenuan sigurinë dhe paqen në veriun e trazuar të vendit, u neutralizuan nga Policia e Kosovës dhe operacioni policor gëzoi mbështetje të gjërë ndërkombëtare. Tre pjesëtarë të bandës terroriste, sipas të dhënave aktuale, u vranë, dy të tjerë u plagosën dhe tetë janë arrestuar deri më tash, ndërsa të tjerët janë arratisur në Serbi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.