KE: Të hiqet vetoja bullgare – po vë në pikëpyetje besueshmërinë e Brukselit

Zëdhënësja e Komisionit Evropian, Ana Pisonero, ka ravijëzuar qëndrimin e KE-së duke deklaruar për mediat maqedonase se vetoja bullgare duhet hequr sa më shpejt.

Kjo e fundit, sipas Pisoneros, po vë në pikëpyetje besueshmërinë e Brukselit zyrtar në raport me shtetet kandidate.

Përparimi i Maqedonisë së Veriut dhe Shqipërisë është bllokuar për shkak të vetos së Bullgarisë për fillimin e negociatave të anëtarësimit me Bashkimin Evropian.

Për Komisionin Europian të dyja shtetet i kanë plotësuar reformat e nevojshme.

Ndërkaq, ministri i Jashtëm i RMV-së, Bujar Osmani, gjatë së hënës deklaroi se presin bisedime konstruktive me qeverinë e re në Republikën e Bullgarisë.

Zyrtari maqedonas përmendi rivendosjen e besimit, bisedimet për çështjet thelbësore që janë në tryezë dhe zhbllokimin e shpejtë të procesit.

“Kjo është gjëja më e rëndësishme për ne”, ravijëzoi Osmani.

I pyetur nga gazetarët nëse është caktuar takimi me kryeministrin bullgar Kiril Petkov, Osmani ka sqaruar se komunikimi do të intensifikohet në ditët dhe javët e para të këtij viti.

Megjithatë, theksoi ai, qeveria e re duhet të votohet në Kuvend.

Kjo e fundit u hap rrugë takimeve formale mes kryeministrit të ardhshëm dhe përfaqësuesve të qeverisë.

Ndërkohë, ministri i Jashtëm ka theksuar se do të kryhen aktivitete përgatitore për realizimin e këtyre aktiviteteve menjëherë pas formimit të qeverisë së re.

Më herët, në një intervistë televizive, kryeministri Petkov deklaroi se Bullgaria dhe Maqedonia duhet të punojnë së bashku.

Kjo, për të arritur në një pikë kur Sofja zyrtare të jetë në gjendje të heqë veton kundër bisedimeve të pranimit të Maqedonisë në BE.

Në intervistat e tij të mëparshme, Petkov caktoi një periudhë gjashtëmujore pas së cilës ai do të ishte gati për të hequr veton.

Deklaratë, të cilën ai nuk do ta pohonte më pas pak kohësh.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.