KDI: Të gjithë të bashkuar kundër korrupsionet

Të gjitha institucionet e vendit, qytetarët dhe partitë politike duhet të bashkohen në luftën kundër korrupsionit, sepse vetëm kështu mund të luftohet kjo dukuri negative, ka thënë Instituti Demokratik i Kosovës (KDI).

KDI edhe këtë vit ka monitoruar procesin e prokurimit publik me fokus në sektorin e shëndetësisë, për të siguruar që blerjet dhe shërbimet gjatë emergjencës shëndetësore të jenë transparente, në përputhje me ekonominë e tregut të lirë dhe konform nevojave të qytetarëve.

Kështu është thënë në aktivitetin e mbajtur të enjten nga kjo organizatë për shënimin e Ditës Ndërkombëtare Kundër Korrupsionit.

Në njoftimin e KDI-së thuhet se ata kanë vazhduar me ofrimin e ndihmës juridike falas për viktimat e korrupsionit, dëshmitarët dhe sinjalizuesit e veprave korruptive.

Ky institut ka treguar se shumë punëtorë të cilët kishin humbur vendet e punës gjatë pandemisë kanë kërkuar ndihmë juridike, po ashtu edhe shumë të tjerë që nuk kishin realizuar të drejtën e pagesës nga pakoja emergjente.

“Në këtë ditë përshëndesim miratimin e Strategjisë për sundimin e ligjit 2021 – 2026, pjesë e së cilës është edhe lufta kundër korrupsionit, por përsërisim shqetësimin tonë për mungesën e një Strategjie Kombëtare Kundër-Korrupsion, nga e cila do të dilnin veprime dhe përgjegjësi konkrete për të gjitha institucionet e thirrura për të luftuar korrupsionin”, thuhet në njoftim.

KDI tutje ka kërkuar nga institucionet vendore që, në vend se të drejtojnë gishtin nga njëra-tjetra në kërkim të fajtorit për mungesë të sundimit të ligjit dhe nivelin e lartë të korrupsionit “të bëhen bashkë në një front të vetëm në luftë kundër korrupsionit”.

Thirrje gjithashtu  i kanë bërë edhe qytetarëve që të jenë më kërkues për rezultate dhe “të mos heshtin ndaj keqpërdorimeve, nepotizmit dhe keq menaxhimit të resurseve publike”.

KDI tutje ka kërkuar nga Qeveria procedim për të gjithë pakon e ligjeve kundër-korrupsion në mënyrë që t’a bëjë qytetarin hisedarë të këtyre ligjeve.

Ndërsa Kuvendit të Kosovës i është kërkuar që t’a ketë prioritet mbikëqyrjen e zbatimit të ligjeve kundër korrupsion dhe partive politike u është kërkuar gjithashtu që të jenë “transparente dhe llogaridhënëse në raport me financimin dhe shpenzimet e tyre”.

Për fund institucioneve të drejtësisë KDI u ka kërkuar që të “ngrisin efikasitetin e punës dhe cilësinë e shërbime” sepse sipas tyre “rezultatet e kthejnë besimin në institucione”.

Sipas KDI-së këto çështje të ndërlidhura do të jenë në qendër të vëmendjes edhe gjatë Samitit për Demokraci të kësaj jave, të thirrur nga Presidenti i SHBA-ve, Joe Biden.

“Udhëheqësit e më shumë se 100 vendeve pritet t’i bashkohen atij për të nisur një ‘vit përplot veprime për të trajtuar bashkërisht korrupsionin, autoritarizmin dhe abuzimin e përhapur të të drejtave të njeriut”.

Ndërsa Presidentja e Kosovës, Vjosa Osmani në këtë Samit do të flasë për tre minuta.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.