KCSS: BE-ja të sigurojë hapësirë për reflektim përmes zvogëlimit të numrit të takimeve midis Kosovës e Serbisë

Në një raport rreth ngërçit aktual në dialogun për normalizimin e raporteve Kosovë-Serbi të Qendres Kosovare për Studime të Sigurisë (KCSS) udhëzohet Bashkimi Evropian (BE) që të reduktojë vëllimin e takimeve në kuadër të dialogut, sikurse në nivel të lartë, ashtu edhe në nivel të kryenegociatorëve, në mënyrë që të rritet efektiviteti në zbatimin e marrëveshjeve.

“Aktualisht, ka shumë takime që përfshijnë negociatorët e Kosovës dhe Serbisë, por edhe ngjarje e takime të tjera ku ata janë të ftuar nga grupe të ekspertëve apo grupe të tjera interesi – kalimi nga një takim në tjetrin nuk lejon hapësirë ​​për arritjen e marrëveshjeve, për të qenë objekt i diskutimeve publike dhe, nuk lejon hapësirë ​​për llogaridhënie e diskutime rreth zbatimit”.

“Duke lejuar më shumë kohë ndërmjet takimeve, kjo do të sigurojë hapësirë ​​për diskutime dhe reflektime të brendshme mbi zbatimin e marrëveshjeve. Kjo qasje do t’u mundësojë të dyja palëve që të shqyrtojnë plotësisht marrëveshjet e arritura, të adresojnë çdo sfidë dhe të zhvillojnë strategji të mirëmenduara për zbatimin e suksesshëm të marrëveshjeve”.

Ndryshe, takimet e mbajtura së fundi në dialogun ndërmjet Kosovës dhe Serbisë nën ndërmjetësimin e BE-së, qoftë në nivel të lartë apo në nivel të kryenegociatorëve, nuk kanë prodhuar rezultate konkrete. Kosova dhe Serbia vazhdimisht fajësojnë njëra-tjetrën për moszbatimin e marrëveshjeve ekzistuese apo për dështimin dhe ngërçin në kuadër të procesit të dialogut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.