Katër orë pritje për t’u larguar nga Kosova përmes pikës kufitare në Merdarë

Qendra Kombëtare për Menaxhim Kufitar në kuadër të Ministrisë së Punëve të Brendshme ka njoftuar të dielen se pritjet për të dalë nga Kosova nëpërmjet pikës kufitare në Merdarë janë deri në 4 orë, ndërsa për të hyrë në Kosovë përmes kësaj pike, pritjet janë deri 5 minuta.

Në raportin e përditësuar të Qendrës Kombëtare për Menaxhim Kufitar, bëhet me dije se për të dalë nga Kosova nëpërmjet pikës kufitare në Merdarë, kolona e veturave shkon deri në 800 metra, kurse për të hyrë në Kosovë, nuk është raportuar për kolona të gjata.

Ndërkaq, pritjet për të dalë nga Kosova nëpërmjet pikës kufitare Dheu i Bardhë janë 30 deri në 40 minuta, ndërsa për të hyrë në Kosovë përmes kësaj pike, pritjet janë deri në 5 minuta. Kolona e veturave për të dalë nga Kosova është 200 metra, kurse për të hyrë nuk është raportuar për kolona.

Në pikat tjera kufitare – Qafë e Prushit, Qafë e Morinës, Kullë, Bërnjak, Hani i Elezit, Mutivodë, Bërnjak, Glloboqicë, Stançiq, Vërmicë, Hani i Elezit – pritjet për hyrje-dalje janë 5 deri në 10 minuta, ndërsa nuk është raportuar për kolona të gjata të veturave, përveç në Jarinjë, Muçibabë e Mutivodë.

Ardhja e diasporës kosovare për t’i kaluar pushimet verore në atdhe dhe pastaj kthimi i tyre në shtetet perëndimore ku jetojnë, javën e fundit ka rikthyer kolonat dhe pritjet e gjata në kufij, veçanërisht në Merdarë dhe te Dheu i Bardhë në kufirin me Serbinë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.