Lajme

Kamberi: Marrëveshja Kosovë-Serbi është në interes të dyja palëve


Shaip Kamberi

Bartësi i listës “Lufta politike e shqiptarëve vazhdon”, Shaip Kamberi, ka thënë se qëllimi i kësaj liste në zgjedhjet parlamentare të 17 dhjetorit në Serbi, është që një ose dy deputetë sa do dalin nga kjo listë, “të ngrenë zërin” në Kuvendin e Serbisë dhe të vënë në dukje diskriminimin ndaj shqiptarëve në Luginë të Preshevës.

“Nëse parimi kushtetues është që shërbimet publike, institucionet shtetërore, madje edhe policia, duhet të pasqyrojnë strukturën e popullsisë në një komunë, veçanërisht kur bëhet fjalë për komunat multietnike, dhe situata në terren është krejtësisht ndryshe, atëherë shkelet e drejta themelore e pakicës për pjesëmarrje në procesin e vendimmarrjes në institucionet e rëndësishme, të cilat vendosin për të drejtat e tyre”, ka thënë Kamberi për televizionin publik serb.

Ai ka deklaruar se diskriminimi i institucioneve serbe ndaj shqiptarëve që jetojnë në Serbi praktikohet edhe në të drejtën e punësimit, sepse për 15 vjet nuk njihen diploma nga Kosova, edhe pse për atë çështje ka tri marrëveshje, prandaj, sipas tij, të rinjtë po largohen nga ato rajone.

Ish-deputeti i vetëm shqiptar në parlamentin e Serbisë ka nënvizuar se Bujanoci, Presheva dhe Medvegja “janë komunat me të ardhura më të ulëta, me shkallë më të lartë të papunësisë dhe pa investime konkrete në hapjen e vendeve të reja të punës”.

“Ai problem i natyrës ekonomike është një problem i madh për të gjithë të rinjtë që ikin prej andej”, shtoi Kamberi.

Sa i përket çështjes se dialogut mes Kosovës dhe Serbisë, që ndërmjetësohet nga Bashkimi Evropian, ai ka theksuar se lista që ai e udhëheqë e mbështet atë proces, dhe në vlerësimin e tij, “është në interes të të dyja palëve dhe të gjithë rajonit që të arrihet ajo marrëveshje sa më shpejt që si Serbia edhe Kosova të hyjnë në BE”.

Tutje, Kamberi ka theksuar se opinioni në Serbi është i “bombarduar” me deklarata të rrejshme se Kryeministri i Kosovës, Albin Kurti, është “përbindësh dhe terrorist”, duke kujtuar se me atë njeri, pra me Kurtin, duhet të arrihet një marrëveshje për të ardhmen e komunitetit serb që jeton në Kosovë dhe “për të ardhmen e marrëdhënieve mes dy kombeve”.

Kamberi në këtë intervistë është provokuar me komentin se sipas Kushtetutës së Serbisë Kosova është pjesë e saj.

Ai i është përgjigjur me një pyetje të thjeshtë “a është?”.

“Po sikur presidenti i Serbisë të mos shkojë në Kosovë pa miratimin e autoriteteve në Kosovë? Nëse kryeministri nuk mund të shkelë në Kosovë pa miratimin e Qeverisë së Kosovës? Kë po gënjejmë?”, tha Kamberi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore