Juventus-i po bën lëvizje të rëndësishme në tregun e transferimeve, me zhvillimet rreth dy mesfushorëve francezë: Adrien Rabiot dhe Khephren Thuram.

Për Rabiot, kontrata e të cilit me Juventus-in skadon më 30 qershor 2024, do të takohen me nënën dhe agjenten e tij, Veronique, gjatë një dite pushimi nga detyrat në Euro 2024. Klubi tashmë ka ofruar një kontratë dyvjeçare me vlerë 7.5 milionë euro në vit, me opsion për një vit të tretë.

Megjithatë, Rabiot po përdor Kampionatin Evropian si vitrinë përpara se të marrë vendimin e tij përfundimtar.

“Calciomercato” raporton se Juventus-i ka bërë përparim në ndjekjen e Khephren Thuram, djalit të ish-lojtarit të tyre, Lilian Thuram.

Drejtori sportiv i klubit, Cristiano Giuntoli, ka arritur një marrëveshje paraprake me përfaqësuesit e Thuram.

Lojtari, i cili kaloi një pjesë të fëmijërisë së tij në Torino, thuhet se ka shprehur dëshirën e tij për t’u bashkuar me Juventus-in.

Kontrata e Thuram-it me Nice-n skadon në vitin 2025 dhe ai ka vendosur të mos rinovojë.

Juventus-i është i gatshëm t’i ofrojë atij një pagë deri në 2.5 milionë euro në vit. Pengesa kryesore tani është negocimi i tarifës së transferimit me Nice.

Klubi francez fillimisht kërkoi 40 milionë euro, por e ka ulur çmimin e kërkuar në 25 milionë euro plus bonuse. Juventus synon të mbyllë marrëveshjen në rreth 15-20 milionë euro plus bonuse.

Gjigantët italianë po konsiderojnë gjithashtu përfshirjen e një lojtari në marrëveshje, me opsione si Moise Kean, Arkadiusz Milik ose talentin e ri Joseph Nonge.