Juristi Ahmeti në 18 pika sqaron se përse pretendimet e Speciales nuk ndërtojnë çështje efektive

Juristi dhe njohësi i të drejtës ndërkombëtare, Arbër Ahmeti ka sqaruar disa nga arsyejet se përse pretendimet e Gjykatës Speciale për të cilat po akuzohen ish krerët e Ushtrisë Çlirimtare të Kosovës nuk janë të sakta.

Ndër argumentin e parë Ahmeti, e ka përmendur kohën që ka llogaritur prokuroria.

“Prokuroria Speciale ka kërkuar më shumë se 700 orë për të paraqitë çështjen e tyre kundër krerëve të UÇK. Në këtë përllogaritje nuk e kanë konsideruar edhe kohën e ekzaminimit dëshmitarëve dhe provave nga mbrojtja. Kërkesa është non-sens në vete dhe dëshmon që SPO nuk ka çështje”.

“Kjo është strategji e dëshpëruar në mungesë të një çështje të qëndrueshme. 700h i bie 175 ditë seanca kur seancat zgjasin 4h/ditë. 700h për të prezantuar çështjen është dyfish më shumë se që i është koha e prokurorisë në TPNJ për të prezantuar çështjen kundër Millosheviçit”.

“Gjykata Speciale ka juridiksion temporal prej 01.01.1998 – 31.12.2000. Aktakuza e bërë publike trajton krimet që pretendohet të jenë kryer brenda periudhës 03’98 – 09’99. Deri tash aktakuza kundër Thaçit et al. ka 6 pika me 10 akuza dhe nuk përfshinë periudhë tjetër”, ka shkruar Ahmeti.

Tutje për krahasim me situatën aktuale në Speciale ka përmendur edhe çështjen e Millosheviç-it dhe akuzat që rëndonin mbi të.

“T’i kthehemi për krahasim çështjes më të madhe e më të komplikuar që e ka trajtuar TPNJ– çështjes së Millosheviqit. Ҫështja e Millosheviqit ka ngërthyer një periudhë prej 9 vite e 3 luftëra në Ballkan, respektivisht vitet 1990-99: luftën e BiH, Kroacisë e së fundmi të Kosovës”.

1. Përveç arsyeve që i kam përmend në një thread të mëhershëm, në shënimin e manifestimit të pakënaqësisë qytetare ndaj gjykatës speciale shkurtimisht po shpjegoj pse pretendimet e prokurorisë janë farsë bazuar në veprimet e kërkesat e saj. 🧵i gjatë: pic.twitter.com/mmhhrT8Ofj

— Arber Ahmeti (@str_arber) April 2, 2023

“Akuzat në ç. e Millosheviqit përfshijnë krime kundër mijëra civilëve në 3 luftëra. Procedura paraprake është mbyllur brenda 7 muajve [shih Nevenka Tromp,2016, fq 52] ndërsa Specialja i ka mbajtur krerët e UÇK‘së mbi 2 vite të burgosur pa kaluar çështjen në shqyrtim gjyqësor”.

Ahmeti, ka kujtuar edhe krimet e luftës që janë bërë në Kosovë gjatë viteve të 90-ta.

“100’000 njerëz kanë humbur jetën gjatë ’90-ave si pasojë e politikave gjenocidale të Serbisë. Në Kosovë janë vra mbi 12 mijë civilë shqiptarë, spastruar etnikisht 1 milion, dhunuar afërsisht 20’000 gra shqiptare e shkatërruar mbi 200’000 shtëpi përfshirë krejt ekonominë e KS”.

“Aktakuza e Millosheviqit ka pasur 66 pika për krimet bazë (krime lufte, krime kundër njerëzimit dhe krimin e gjenocidit). Ajo është organizuar në 66 pika përfshinte në vete rreth 5000 deri në 6000 akuza individuale”.

Në çështjen e Millosheviçit, ai ka bërë të ditur se prokuroria ka pasur në dispozicion 360 orë për të prezantuar çështjen e vet dhe këtë e ka bërë në 90 seanca të mbajtura.

“Seancat kanë zgjatur katër orë në ditë, dhe nga viti 2003 për shkak të shëndetit të tij janë mbajtur tre herë në javë”.

“Kur merren parasysh punët adm., ballafaqimit me dëshmitarët/marrja në pyetje, prezantimi i çështjes ka zgjatë 294 ditë. Ky faktor i mbivendoset 90 ditëshit brenda të cilit prokuroria ka arritë me e prezentu çështjen”.

“Për të gjithë periudhën që akuzohet dhe për 3 luftërat në Ballkan, M. i janë thirrë 296 dëshmitarë viva voce Gjatë gjykimit janë prodhuar 1.2 milion faqe prova, 930 prova materiale, 64000 f. parashtrime e 328 dëshmitarë”.

Në rast  se kërkesa e Prokurorisë konfirmohet, jurisiti Ahmeti deklaron se Thaçi do të kaloj katër deri në gjashtë vjet burg.

“Periudhës 90 ditë (360h) të prokurorisë kur ia mbi-vendosim aspektet adm. dhe marrjen në pyetje të dëshmitarëve nga mbrojtja ka zgjatur 3.2 herë më shumë se sa prezantimi i çështjes nëse nuk marrim parasysh këta dy faktorë”.

“Sipas kësaj logjike nëse kërkesa e prokurorisë që të ketë 700 orë në dispozicion aprovohet atëherë totali do të jetë diku rreth 2240 orë apo 560 seanca dëgjimore për t’u përmbyllur prezantimi i çështjes së prokurorisë. Në këtë rast Thaçi do të kenë kaluar 4 vite burg”.

“4 vite pa prezantuar çështjen e mbrojtjes, e nëse nuk ka vonesa deri në vendimin e shkallës I-rë do të kenë bërë 6 v. burg. Procesi i Millosheviqit me vonesat, 60h të humbura, anulime e shtyrje të seancave nuk ka zgjatur sa do të zgjasë 2/3 e procesit kundër krerëve të UÇK”.

Ai një kërkesë të tillë e ka quajtur “absurde”, duke thënë se kjo tregon edhe për gjykatën dhe mënyrën se si i merr vendimet.

“Kërkesa e SPO për të pasur 700h në dispozicion për të paraqitur çështjen është absurd, e kjo dëshmon që SPO në mungesë të provave do të hedhë çdo gjë që mundet në seancat dëgjimore pavarësisht se a kontribuojnë në dëshmimin e pretendimeve të saj kundër Thaçit”.

“Në çështjen e Karaxhiqit Paneli Gjyqësor i ka ndarë prokurorisë 300 orë në dispozicion për të prezantuar çështjen. Kjo kërkesë që realisht shkon kundër mësimeve të nxjerra nga më shumë se 20 vjet drejtësi penale ndërkombëtare shpërfaqë që prokuroria ka një çështje të dobët jo-koncize, të menaxhuar keq, që nuk mund ta argumentojë dhe me pretendime që nuk mund t’i dëshmoj, ne vend të një çështje efektive e që siguron gjykim të shpejtë e efektiv”.

Sipas tij, “veprimet e SPO shkojnë kundër praktikave të krijuara nga tribunalet ndërkombëtare 30 vitet e fundit”.

Ahmeti, ka theksuar se pas një periudhe kaq të gjatë Zyra e Prokurorit të Specializuar nuk ka siguruar prova të mjaftueshme.

“Në ndërkohë edhe pas 7 viteve hetime, dosjeve hetimore të UNMIK-ut, EULEX’it e Prokurorisë Serbe, si duket SPO nuk ka qenë në gjendje të ndërtojë një çështje efektive e po shkon drejt edhe një dështimi monumental të drejtësisë ndërkombëtare”.

Më 3 prill ka nisur gjyqi ndaj ish-presidentit të Kosovës, Hashim Thaçi, ish-kryeparlamentarëve, Jakup Krasniqi dhe Kadri Veseli, dhe ish-anëtarit të Shtabit të Përgjithshëm të UÇK-së, Rexhep Selimi, ndërsa qytetarët presin që drejtësia të bie në vendin e vet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.