Joseph: SHBA-ja dhe BE-ja duhet të zgjohen ta trajtojnë çështjen e Kosovës në mënyrë strategjike

Ish-zëvendësshefi i misionit të OSBE-së në Kosovë, Edward Joseph, ka deklaruar se Shtetet e Bashkuara të Amerikës (SHBA), janë duke gabuar që po e vendosin fajin tek Kosova sa i përket situatës në Veri.

Sipas tij, kryeministri i Kosovës Albin Kurti, e ka njëfarë faji, por të përbashkët me presidentin e Serbisë, Aleksandër Vuçiç.

Ndër të të tjera ka potencuar se, “SHBA-ja është duke e tepruar në qasje ndaj Vuçiç-it”, pas sulmeve ndaj ushtarëve të KFOR-it në Veri që ai i konsideron fyerje ndaj misionit.

“SHBA-të duhet të zgjohen, veçanërisht pas këtyre sulmeve ndaj ushtarëve të KFOR-it, kjo është fyerje”.

Joseph, pas ndalimit të tre policëve nga Serbia ka kërkuar që NATO-ja dhe KFOR-i duhet të japin “gjykimin e tyre profesiona”.

“NATO dhe KFOR-i duhet të japin gjykimin e tyre profesional, dhe edhe nëse nuk duan ta ndajnë këtë publikisht, duhet të informojnë Shtetet e Bashkuara, të informojnë Bashkimin Evropian, vendet e tjera kyçe të Bashkimit Evropian dhe të vërtetojnë këto fakte themelore. Ky është numri një”.

“Numri dy është ajo që duhet të bëjë Prishtina dhe çfarë duhet të bëjnë kryeministri Kurti dhe presidentja Osmani”.

“Ne nuk duam asnjë përshkallëzim, ne kemi parë tashmë dhunë, shpërthim në një mënyrë të tmerrshme më 29 maj në veri, me këto sulme të tmerrshme ndaj KFOR-it dhe ndaj policisë speciale të Kosovës nga serbët”, ka thënë ai në një intervistë për The Geopost.

Ai ka shtuar se “NATO-ja duhet të japë një përgjigje”.

Sipas tij, është në kompetencat e NATO-s që të tregohet zona e cila është e përcaktuar me Marrëveshjen e Kumanovës, pasi konsideron se nuk mund të jetë brenda Serbisë lokacioni ku thuhet se tre policët kosovarë u morën.

“Por nëse krijoni një zonë sigurie prej 5 kilometrash, si është e mundur që policia e Kosovës të shkojë 5 kilometra?”.

“Nuk mendoj se në Beograd po thonë fare se ka qenë 5 kilometra, kështu që NATO-ja me të vërtetë duhet ta thotë këtë dhe përfaqësuesit e Kosovës, kryeministri Kurti dhe presidentja Osmani, duhet të qëndrojnë në kontakt shumë të mirë dhe të tregojnë vendosmëri shteti, për të shmangur përshkallëzimin”.

Të mërkurën tre zyrtarë kufitarë janë kidnapuar nga forcat serbe gjatë një patrullimi në vendin e quajtur Tresave/Bare, në vijën kufitare në veri të Kosovës.

Megjithatë, autoritetet serbe pretendojnë se ata janë arrestuar nga njësitet anti-terror të xhandarmërisë serbe brenda territorit të Serbisë.

Nga ana tjetër, autoritetet e Kosovës kanë kërkuar lirimin e menjëhershëm të tre zyrtarëve policorë të rrëmbyer nga policia serbe të mërkurën, reagimin e bashkësisë së organizuar ndërkombëtare lidhur me këtë rast dhe dënimin e Serbisë për agresionin e shfaqur.

Arrestimi i tre policëve kosovarë nga njësitet elitare të Policisë së Serbisë në vijën kufitare me Kosovën, ndodhi pikërish në një periudhë tensionesh ndërmjet Kosovës dhe Serbisë, veçanërisht në pjesën veriore të Kosovës të banuar serbë etnikë.

Pas këtij veprimi, Kosova ka ndaluar hyrjen e të gjitha mallrave në Kosovë.

Nga Qeveria e Kosovës të enjten u tha se janë shtrënguar kontrollet kufitare me Serbinë, nga kryeministri Albin Kurti u tha se synimi i tyre “është siguria”.

Tensionet nisën më 26 maj, kur kryetarët e rinj shqiptarë të komunave në veri, nën asistimin e Policisë së Kosovës, hynë në ndërtesat komunale, mes kundërshtimeve të serbëve lokalë.

Tensionet kulmuan më 29 maj, kur në Zveçan, protestuesit serbë u përleshën me pjesëtarët e misionit të NATO-s në Kosovë, KFOR.

Nga përleshjet ishin lënduar dhjetëra persona nga të dyja palët.

Ndërsa, më 13 qershor, Policia e Kosovës ka kryer një aksion në Veri, ku arrestoi Millun Millenkoviç.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.