Java Çame/ Për Shpëtim Idrizin shteti grek ka një qëndrim “foshnjarak” ndaj çështjes çame

Shpëtim Idrizi, kryetari i PDIU-së, ka kujtuar javën Çame në fjalën e mbajtur në foltoren e Kuvendit.

Një kujtesë për gjenocidin e kryer në fund të Luftës së Dytë Botërore ndaj popullsisë çame në Greqi.

Ai, nga salla e Parlamentit, ka treguar se shteti grek ka një qëndrim “foshnjarak” ndaj çështjes çame, duke pretenduar se nuk ekziston.

“27 qershori është i njohur nga ky Parlament si dita e gjenocidit ndaj popullsisë çame në Greqi”, ka pohuar Idrizi.

“Në fund të Luftës së Dytë Botërore, nga 27 qershori 1944 deri në mars 1945, u krye një nga spastrimet etnike më të pashembulltat në historinë e njerëzimit”, ka vijuar ai.

Sipas tij, 2 mijë e 770 jetë njerëzore u masakruan barbarisht. Nuk u vranë në luftë, por në shtëpitë e tyre.

Kurse 30 mijë të tjerë u dëbuan dhe 2 mijë e 900 të tjerë vdiqën nga uria, etja dhe sëmundjet “në një rrugëtim biblik drejt Shqipërisë”.

“Çamët sot nuk gëzojnë dot pronat e tyre. Shteti i sotëm grek ka një qëndrim foshnjarak, ‘ne këtë çështje nuk e njohim dhe nuk ekziston’. E thënë kështu, më kujton njeriun që mbyll sytë për të mos parë realitetin”, ka ravijëzuar ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.