Japonia kërkon nga Kosova e Serbia “zbatim të shpejt e me mirëbesim” të Marrëveshjes së Ohrit

Ambasadori i Japonisë në Serbi, Akira Imamura, në një intervistë për të përditshmen serbe “Politika”, ka thënë se Japonia mbështet përpjekjet e Bashkimit Evropian për normalizimin e marrëdhënieve ndërmjet Kosovës dhe Serbisë, ndërsa iu ka bërë thirrje të dyja palëve të zbatojnë obligimet nga Marrëveshja e Brukselit/Ohrit.

Diplomati japonez ka theksuar se Japonia monitoron nga afër situatën e tensionuar në veriun e Kosovës të banuar me serbë etnikë, ndërsa ka potencuar sërish domosdoshmërinë që të dy palët të ndërmarrin hapa të menjëhershëm për de-eskalimin e plotë të situatës atje.

“Kemi apeluar fuqishëm tek të dyja palët që të angazhohen sërish në dialogun e lartpërmendur dhe të zbatojnë me shpejtësi e në mirëbesim detyrimet e tyre nga marrëveshja për rrugën e normalizimit të marrëdhënieve dhe nga aneksi për zbatimin e marrëveshjes”, ka deklaruar Imamura.

Bashkimi Evropian dhe Shtetet e Bashkuara të Amerikës deri më tani nuk kanë arritur të gjejnë rrugën për t’i bindur palët që ta kuptojnë marrëveshjen si obligim ndërkombëtar. Gjithashtu, dialogu për normalizimin e marrëdhënieve është ndërprerë për shkak të tensioneve në veri.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.