Izraeli në “gatishmëri shumë të lartë” përgjatë kufirit verior me Libanin

Ushtria izraelite ka bërë me dije se është në “gatishmëri shumë të lartë” përgjatë kufirit verior të vendit me Libanin.

Po ashtu ka shtuar se do t’i “përgjigjet çdo ngjarjeje” në kufi.

Më herët, ushtria izraelite ka njoftuar se ka eliminuar të enjten një skuadër luftëtarësh të Hezbollahut në Liban dhe se ka dëmtuar një nga infrastrukturat e grupit.

Ushtria tha se veproi në përgjigje të një sulmi të kryer nga territori libanez drejt një poste ushtarake afër kufirit në Izraelin verior.

Për shkak të sulmit, një ushtar izraelit dhe një rezervist u evakuuan për të marrë trajtim mjekësor për shkak të lëndimeve të moderuara, tha ushtria.

Kujtojmë se një investigim i ri nga grupi i të drejtave me bazë në Mbretërinë e Bashkuar “Amnesty International” ka gjetur se “ushtria izraelite përdori pa dallim, dhe për këtë arsye në mënyrë të paligjshme”, fosfor të bardhë në një sulm në Dhayra, në Libanin jugor, më 16 tetor.

“Sulmi duhet të hetohet si një krim lufte”, tha Amnesty International në median sociale “X”.

Nuk ka pasur asnjë koment të menjëhershëm nga Izraeli, i cili në të kaluarën ka mohuar akuza të tilla.

Grupet e të drejtave të njeriut kanë akuzuar autoritetet izraelite për përdorimin e fosforit të bardhë në sulmet e tij si në Gaza ashtu edhe në Liban.

Banorët e Dhayra-s, Libani i Jugut, i thanë L’Orient-Le Jour më herët se Izraeli përdori fosfor të bardhë mbrëmjen e 16-17 tetorit.

Ata thanë se sulmet e fosforit të bardhë penguan civilët të iknin, shpëtimtarët të mbërrinin dhe ndezën disa nga shtëpitë dhe fushat përreth.

Përdorimi i fosforit të bardhë është i ndaluar kundër civilëve ose objekteve civile sipas Protokollit III të Konventës për Disa Armë Konvencionale.

Izraeli përdori gjithashtu fosfor të bardhë në Gaza në vitet 2008 dhe 2009.

L’Orient-Le Jour kreu një hetim për të përcaktuar nëse Izraeli përdorte fosfor të bardhë në Dharya.

Gazetarët libanezë intervistuan rreth dhjetë banorë që ishin në vendngjarje në atë kohë, mjekë, pjesëtarë të mbrojtjes civile, ekspertë ushtarakë dhe avokatë të të drejtave të njeriut.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.