Lajme

Italia do të çlirohet nga varësia e gazit rus brenda vitit


Italia planifikon t’i japë fund varësisë së saj nga gazi rus deri në fund të këtij viti.

Kështu deklaroi ministri i Industrisë, Adolfo Urso, në një intervistë për Il Messaggero.

“Me dy impiantet e rigazifikimit në Pimbino dhe Ravenna, të cilat do të funksionojnë deri në verë, ne do të çlirohemi nga Rusia: do të prodhojnë 10 miliardë metra kub gaz, pikërisht atë që u importua nga Moska vitin e kaluar”, tha Urso.

Sipas tij, vitin e ardhshëm Italia do të jetë në gjendje të fillojë furnizimin me gaz për vendet e tjera dhe së shpejti të bëhet një qendër evropiane e gazit, kjo falë dyfishimit të flukseve përmes gazsjellësit Trans-Adriatik nga Azerbajxhani.

“Ne duhet të bëjmë të njëjtën gjë në frontin e energjisë elektrike: ne mund të bëhemi qendra e energjisë elektrike e Mesdheut dhe me megafabrikën Enel në Catania, prodhuesi më i madh i paneleve diellore në Evropë. E ardhmja e vendit është e lidhur me investimet në teknologjitë e gjelbra dhe digjitale: nga bateritë te gjysmëpërçuesit, përmes turbinave, akumulatorëve dhe paneleve në veçanti”, shtoi ministri.

2025

Transportimi me kapacitet të plotë të Gazsjellësit Trans Adriatik (TAP) ka të ngjarë të jetë gati në fund të vitit 2025.

Kështu ka deklaruar, Luca Schieppati, drejtor menaxhues i TAP-it në një intervistë për agjencinë e lajmeve në Azerbajxhan “Trend”.

Ai ka theksuar se, po vlerësohen kërkesat për dërgesat nga viti 2026 deri në dhjetor 2028 dhe, në një fazë të dytë, nga tetori 2026 deri në shtator 2033.

Schieppati solli një vëmendje sasinë prej 1 miliard metër kub (bcm) gaz natyror nga Azerbajxhani që tashmë ka hyrë tashmë në Evropë, nëpërmjet pikës së interkonjeksionit në Kipoi, Greqi, aty ku TAP-i bashkohet me Gazsjellësin Trans-Anatolian (TANAP).

“Nga 1.2 bcm – 1 bcm në Itali dhe 200 mcm në Shqipëri – TAP-i do të shtojë një minimum prej 10% karburant shtesë”, përcaktoi ai.

Tanimë kjo shënon fillimin e zgjerimit të kapaciteteve të TAP-it, i cili ka si synim transportimin deri në 20 bcm në vit deri në vitin 2027.

“Zgjerimi i kapaciteteve është një çështje ofrimi dhe kërkesash, zgjerimi i plotë ka të ngjarë të arrihet kur kontrollet tona të tregut të verifikojnë angazhimet detyruese nga transportuesit”.

Kështu, Schieppati sqaroi se në vitin 2023 kompania planifikojn të vazhdojë me efikasitetin e arritur në vitet e fundit.

Çfarë përfaqëson TAP-i?

TAP është pjesë e Korridorit Jugor të Gazit dhe një projekt tubacioni për të transportuar gaz natyror, nga Greqia nëpërmjet Shqipërisë dhe Detit Adriatik në Itali dhe më tej në Evropën Perëndimore.

Tubacioni furnizohet me gaz natyror nga faza e dytë e zhvillimit të fushës së gazit Shah Deniz të Azerbajxhanit, në pjesën e azerbajxhanit të Detit Kaspik, përmes Tubacionit të Kaukazit të Jugut dhe TANAP.

Gjatësia e përgjithshme e tubacionit është 878 kilometër (km), nga të cilat 550 km janë në Greqi, 215 km në Shqipëri, 105 km në det të hapur dhe 8 km në Itali.

Kapaciteti fillestar i gazsjellësit është rreth 10 miliardë metra kub gaz natyror në vit, me opsionin për të zgjeruar kapacitetin deri në 20 miliardë metra kub.

Aksionarët e TAP janë BP (20%), SOCAR (20%), Snam (20%), Fluxys (19%), Enagás (16%) dhe Axpo (5%).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore