Mbrëmjen e së hënës, do të zhvillohen ndeshjet e fundit kualifikuese të Kupës së Botës, “Katar 2022”, për grupet C, F dhe I.
Derisa situata në grupet F dhe I, është e qartë, ku dihen vendet e para dhe të dyta, e njëjta gjë nuk qëndron në Grupin C, ku Italia dhe Zvicra po garojnë për vendin e parë, që sjell kualifikimin direkt për në Katar.
Këto dy kombëtare u ballafaquan direkt mes tyre në ndeshjen e fundit, e cila përfundoi me rezultat të barabartë 1:1, ku Italia pati një mundësi shumë të mirë për të fituar ndeshjen, por Jorginho humbi penalltinë në minutën e fundit të ndeshjes.
Sikur të shënonte Jorginho nga ajo penallti, të kaltrit e Roberto Mancini-t thuajse do ta siguronin kualifikimin tutje, por tani gjërat janë paksa më të ndërlikuara.
Në “Windsor Park” të Belfastit, Italia do të kërkojë kualifikimin direkt në Kupën e Botës dhe për të ta arritur këtë qëllim duhet të fitojë, madje ndoshta edhe me diferencë golash ndaj Irlandës së Veriut.
Në anën tjetër, Zvicra do të ketë përballë Bullgarinë dhe nëse fitorja e mundshme e përfaqësueses helvete do të jetë aq e thellë se të rikuperojë dy gola disavantazh ndaj Italisë, atëherë do të kualifikoheshin direkt në Katar.
Pra, do të jetë një situatë shumë interesante në këtë grup, ku mbrëmjen e së hënës do të mësohet se cila kombëtare do të kualifikohet direkt, e cila do ta kërkojë atë përmes fazës play-off.
Në Grupin F, tashmë janë përcaktuar vendi i parë dhe i dyti, ku Danimarka ka siguruar kualifikimin direkt, ndërsa në vendin e dytë në këtë grup, ka arritur Skocia, të cilët do të luajnë në fazën play-off.
Danimarka madje ka qenë një ndër përfaqësueset më të mira të këtyre eliminatoreve, të cilët nuk njohin humbje, as barazim, madje golin e parë në këto ndeshje, e pësuan në takimin e fundit ndaj Ishujve Faroe, ku kanë një gol dallim fantastik prej 30:1.
Në Grupin I, vetëm një mrekulli po të ndodhte, do ta linte jashtë kualifikimit direkt kombëtaren e Anglisë.
Anglezët do të përballen me San Marinon, ndeshje në të cilën të t’iu duhej vetëm një pikë për të siguruar vendin e parë.
Në anën tjetër, Polonia ka siguruar vendin e dytë dhe ndeshjen ndaj Hungarisë do ta zhvillojnë vetëm për prestigj dhe për të grumbulluar pikë sa më shumë.
Anglia momentalisht ka 23 pikë në vendin e parë, kurse Polonia renditet e dyta me 20 pikë, pesë më pak se Shqipëria e vendit të tretë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
