Në Kroaci, vetëm pak minuta lundrim nga ishulli Hvar, gjendet një tjetër ishull i quajtur Marinkovac.
Ky ishull i pabanuar tërheq shumë turistë gjatë ditës.
Aty ndodhet edhe Carpe Diem, një nga 15 klubet më të mira në botë dhe vendi ku festa vazhdon deri në agim.
Pothuajse çdo minutë varkat taksi të mbushura me turistë, fillojnë të sjellin në breg njerëz të rinj, të cilët janë gati për të festuar.
Atmosferë ekstatike
Një skenë e denjët për klubet më të njohura të botës. Dritat e klubit ndriçojnë tërë ishullin, dhe qindra të rijnë grumbullohen për të kërcyer nën ritmet e muzikës elektronike.
Ajo çfarë e bën interesantë këtë klub është se pothuajse askush nuk ka një gotë në dorë, qëllimi për të ardhur në Carpe Diem është të mos dehet. Gjithçka që njerëzit duan është të kalojnë një kohë të mirë.
Dritat vezulluese, prozhektorët e çmendur, tymi që buron nga skena, trupat që lëkunden e lëkunden pa pushim, duart në ajër, buzëqeshjet në ekstazë bëjnë që askush të mos godas aksidentalisht me bërryla apo të shkel mbi njëri-tjetrin duke kërcyer në një sulm ritmik teksa DJ luan muzikën e tij.
Shfaqja nxitet më tej nga dy kërcimtare paksa të zhveshura që dominojnë skenën. Që askush të mos mbetet jashtë, është edhe një i ri me bust të zhveshur, lëvizjet e të cilit i vënë në ekstazë zonjat dhe herë pas here skena “shpërthen” me fishekzjarre të fuqishme.
Ajo që është më e mira, “askujt këtu nuk i intereson se çfarë do të mendojnë të tjerët për të. Askush nuk të shikon duke kërcyer, qëllimi i të gjithëve është vetëm të argëtohen dhe të relaksohen”, shpjegon një i ri nga Zagrebi që e viziton vendin pothuajse çdo vit.
Edhe pse muzika është e lartë, ajo nuk është shurdhuese, gjë që është e pazakontë për klube si ky.
Carpe Diem origjinal u krijua në Hvar më shumë se 25 vjet më parë. Në atë kohë ishte një nga klubet e pakta të këtij lloji. Të rinj nga e gjithë bota mësuan për Hvarin dhe Kroacinë përmes Carpe Diem, një vend ku çdo verë garantohet një nga festat më të mira në detin Adriatik.
Plazhi Carpe Diem është një vazhdim logjik i atij projekti të suksesshëm sepse festa vazhdon atje edhe kur Hvarin e zë gjumi dhe klubet mbyllen. Pastaj mysafirët e rinj vijnë në Marinkovc dhe vazhdojnë të kërcejnë deri në mëngjes.
Njerëzit në ishull nuk shqetësojnë askënd, argëtimi nuk ka kufi.
Të ftuar nga e gjithë bota
Kapaciteti i këtij klubi është 1 mijë e 500 vizitorë. Duket si shumë, por plazhi Carpe Diem është plot pothuajse çdo natë gjatë muajve të verës. Tarifa e hyrjes është 300 HRK (afro 40 euro), e cila përfshin një biletë kthimi për varkën e taksisë nga Hvar dhe mbrapa. Në netët më të çmendura ka më shumë njerëz, si mysafirë, ashtu edhe staf, se sa ka banorë e gjithë Lastova apo Mljeti.
Lejla, Selma dhe Johana janë 19-vjecaret që kanë ardhur nga Suedia e ftohtë për të vizituar ishullin.
Për to, Kroacia është vendi më i mirë për takime dhe Hvari është vendi kryesor. E vetmja pengesë e tyre janë çmimet e larta, megjithatë në krahasim me destinacionet e tjera evropian çmimet mbesin më të ulëta
Edhe 32 vjecari, Alex nga Anglia i cili ka ardhur në Kroaci për shtatë ditë ankohet për çmimet e larta.
“Në fund të fundit, ky është një klub prestigjioz dhe sigurisht gjithçka do të jetë pak më e shtrenjtë atje. Por festa është fenomenale. Vajzat janë të bukura, të gjitha janë shumë të relaksuara dhe të gëzuara, dhe muzika është fantastike. Ka pak destinacione në botë që mund të ofrojnë diçka të tillë. Festoni me pamje nga drita e hënës dhe detit, pini pije të mira, kërceni deri në agim… Nuk e keni kudo”, thotë ai.
Një ushtri punonjësish
Por atmosfera e errët, mistike dhe intime gjatë natës e Carpe Diem është në kontrast të plotë me atë që ofron versioni i ditës. Kur e gjeni veten në ishull në orët e mëngjesit, asgjë veç skenës qendrore nuk të jep përshtypjen se disa orë më parë kishte në ishull një turmë njerëzish që festonin nga e gjithë bota.
“Ushtria” e punonjësve të këtij klubi elitar ka qëndruar në këmbë që nga mëngjesi, duke pastruar gjithçka që lanë pas të ftuarit, ishulli rikthehet sikur të mos kishte ndodhur asgjë. Atmosfera familjare, shezllonet, tendat, por edhe oferta top gastronomike heq nga Carpe Diem etiketën e klubeve të natës sepse Carpe është një pako e plotë.
Menaxheri i klubit, Luka Pofuk thotë se kjo është shumë e rëndësishme për stafin.
“Po, sigurisht që jeta e natës është e rëndësishme për ne, por duam që njerëzit të vijnë këtu për t’u çlodhur edhe gjatë ditës. Ne kemi një restorant të lartë që është i hapur gjatë ditës dhe nuk keni nevojë të blini një biletë ditën”.
Klubet e natës në Adriatik kishin një reputacion të keq për disa kohë. Popullsia vendase e kundërshtoi zhurmën e tyre, pati përleshje, bastisje policie madje edhe drogë.
Por kohët po ndryshojnë.
Marrë nga “Jutarnji List”, përshtatur për “Albanian Post”.
/Albanianpost.com
