Ishte më i miri në ekip kundër Bayern-it, Asllani: Kemi bërë paraqitje të mirë

Kristjan Asllani luajti 90 minuta në ndeshjen e mbrëmshme, në të cilën ekipi i tij, Inter, u mposht me rezultat 2:0 nga Bayern Munich në ndeshjen e fundit të grupeve në Ligën e Kampionëve.

Kjo ishte hera e tretë që Asllani e nisi ndeshje nga fillimi për Inter-in, derisa mesfushori kuqezi u vlerësua me notën më të lartë në fushë nga radhët e Inter-it, sipas “Sofascore”.

20-vjeçari i lindur në Elbasan, u vlerësua me notën 7.3 (më së shumti te Inter), derisa pas tij ishin Stefan de Vrij me 7.1 dhe portieri Andre Onana me notën 7.2.

Mesfushori kuqezi e preki topin 47 herë në këtë ndeshje dhe nga 36 pasime, 33 kanë qenë të sakta, apo 92% prej tyre.

Një provë e mirë e shqiptarit, që me siguri do ta shtyjë trajnerin e tij, Inzaghi-n t’i besojë më shumë në ndeshjet në vazhdim.

Pas ndeshjes, Asllani foli në konferencë për media, derisa theksoi se pavarësisht humbjes, Inter tashmë e ka arritur qëllimin e tyre në Ligën e Kampionëve dhe duhet të fokusohen në ndeshjen e radhës në Serie A, ku do të ballafaqohen me Juventus-in.

“Mendoj që e kemi arritur suksesin për t’u kualifikuar. Është keq që nuk e përfunduam me fitore, por kundërshtari ishte vërtet i fortë sonte. Ne kaluam, megjithatë, kjo është me rëndësi”, theksoi Asllani.

“Ne kemi qenë një grup në të gjitha ndeshjet, veçanërisht në shtëpi kundër Barcelonës. Nga nesër i drejtohemi Juventus-it, e dimë që nuk mund të humbasim më pikë në kampionat”, shtoi mesfushori shqiptar.

Kujtojmë që 20-vjeçari deri më tani është paraqitur në 11 ndeshje me fanellën e Inter-it në këtë sezon në Serie A dhe në Ligën e Kampionëve, ku numëron vetëm 296 minuta të luajtura.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.