Ish-kreu i Kadastrës së Vlorës në kërkim, falsifikoi dokumenta dhe mbante 60 mijë euro në banesë

Ish-kreu i Kadastrës së Vlorës, Klodian Toçi, është shpallur në kërkim nga gjykata e këtij qarku, nën akuzën e pjesëmarrjes në një grup që falsifikonte dokumentacion pronash në Dhërmi.

Gjatë kontrolleve të kryera nga Prokuroria e rrethit, Toçit iu gjetën 60 mijë euro në banesë. Po ashtu, janë gjetur edhe dokumente të ndryshme. Këto të fundit janë sekuestruar në cilësinë e provës materiale.

Masa e caktuar ndaj ish-kreut të kadastrës, është ajo e arrestit me burg, sipas vendimit të Prokurorisë. Po ashtu, në njoftim bëhet me dije se masa është ekzekutuar prej shërbimeve të Policisë Gjyqësore. Pra, nga këta të fundit është bërë edhe kontrolli në shtëpinë e Toçit.

Kadastra e Vlorës ka qenë ndër më problematiket në vitet e fundit në Shqipëri. Arsyeja është për shkak të ndërhyrjeve të shumta në pronat e shumëlakmuara të qytetit bregdetar.

Dhjetëra krerë të kadastrës kanë hequr dorë nga posti vitet e fundit.