Irlanda nuk zbaton ligjin e BE-së kundër kompanive teknologjike

Mbi kompanitë e mëdha teknologjike, Irlanda nuk po zbaton ligjet e privatësisë të Bashkimit Evropian, me 98 për qind të 164 ankesave të rëndësishme për abuzimet me privatësinë ende të pazgjidhura nga rregullatori i vet.

Agjencia e lajmeve “Financial Times”, tregon se Google-i, Facebook-u, Apple-i, Microsoft-i dhe Twitter-i kanë selinë e tyre evropiane në Dublin, duke e kthyer Komisionerin Irlandez të Mbrojtjes së të Dhënave (DPC) në rregullatorin kryesor të BE-së.

Kështu, ai është përgjegjës për mbajtjen e tyre ndaj ligjit.

Mirëpo, DPC-ja irlandeze është kritikuar vazhdimisht, si nga aktivistët e privatësisë ashtu edhe nga rregullatorët e tjerë të BE-së për dështimin në ndërmarrjen e veprimeve.

Referuar një analize të Këshillit Irlandez për Liritë Civile (ICCL), shumica dërrmuese e rasteve ishin ende të pazgjidhura dhe se Spanja, e cila ka një buxhet më të vogël se Irlanda për mbrojtjen e të dhënave, prodhonte 10 herë më shumë projektvendime.

Një anëtar i lartë i ICCL-së, Johnny Ryan, ka thënë se Irlanda ishte “ngushtica më e keqe” për zbatimin e Rregullores së Përgjithshme të BE-së për Mbrojtjen e të Dhënave.

“Zbatimi i GDPR-së kundër kompanive të mëdha teknologjike është i paralizuar nga dështimi i Irlandës për të dhënë projektvendime për rastet ndërkufitare”, ka shtuar ai, duke vënë në dukje se pjesa tjetër e BE-së duhet të presë për projektvendimet irlandeze para se të jenë në gjendje të ndërmarrin veprimet e tyre kundër kompanive.

Ndërkohë, Estelle Massé, analiste e lartë e politikave në Access Now, ka treguar se “i gjithë sistemi i bashkëpunimit mbështetet në disa agjenci të mbrojtjes së të dhënave që merren me rastet dhe deri më tani kjo mezi po ndodh”.

“Financial Times” dallon se ngadalësia irlandeze është kritikuar nga disa vende të tjera evropiane, përfshirë Francën, Spanjën dhe Italinë.

Në muajin korrik, parlamenti irlandez publikoi një raport që bënte thirrje për reformën e DPC-së irlandeze dhe e nxiti të fillojë zbatimin e GDPR-së. Kjo pasi kishte “frikë se të drejtat themelore të qytetarëve janë në rrezik”.

Në mars, tensionet e vazhdueshme mbi trajtimin e Irlandës ndaj kompanive të mëdha teknologjike shpërthyen në publik pasi zyrtarët gjermanë sulmuan irlandezët.

Mbikëqyrësi kryesor gjerman i mbrojtjes së të dhënave, Ulrich Kelber, u shkroi anëtarëve të Parlamentit Evropian për t’u ankuar se vetëm Gjermania “kishte dërguar më shumë se 50 ankesa për WhatsApp-in” tek autoritetet irlandeze dhe se “asnjëra prej të cilave nuk ishte zgjidhur deri më sot”.

Ai ka kritikuar edhe “trajtimin jashtëzakonisht të ngadaltë të çështjes së Irlandës, e cila bie ndjeshëm prapa përparimit të trajtimit të çështjeve të shumicës së mbikëqyrësve të BE-së dhe veçanërisht atyre gjermanë”.

Kelber ka theksuar se deri në fund të vitit të kaluar, Irlanda po udhëhiqte 196 raste, por kishte mbyllur vetëm katër prej tyre, ndërsa Gjermania kishte mbyllur 52 nga 176 raste.

Nga ana tjetër, zyrtarët e BE-së janë shprehur se Brukseli ishte i kufizuar në atë që mund të bënte për të detyruar Dublinin të vepronte.

Kjo pasi rregullat e privatësisë së BE-së i japin Bordit Evropian të Mbrojtjes së të Dhënave fuqinë për të vepruar kundër mbikëqyrësve të të dhënave në nivel shteti anëtar, por fuqitë e tij janë të kufizuara dhe nuk mund të detyrojë një autoritet të tillë si DPC-ja e Irlandës të bëjë punën e vet.

Dhe bazuar te rregullat aktuale, Dublini është në pozicionin më të fortë për të detyruar agjencinë e vet të mbrojtjes së të dhënave të ushtrojë kompetencat.

Sidoqoftë, zyrtarët kanë sqaruar se në teori, BE-ja mund të hapë procedura për shkelje kundër një shteti anëtar që nuk sjell politika efektive për të mbrojtur rregullat e privatësisë.

/Albanianpost.com