Pajisje

IPhone-i pritet të nxisë shitjet, por App Store-i përballet me rrezikun rregullator


Një rritje e kompanisë teknologjike Apple, pritet të vijë nga shitjet e fuqishme të iPhone 5G dhe shërbimeve të tilla si App Store dhe Apple Music, por disa investitorë do të ndjekin strategjinë e kompanisë për të shmangur antitrustin.

Agjencia e lajmeve, “Reuters”, tregon se biznesi i shërbimeve përballet me procese gjyqësore, vëzhgim rregullator, përfshirë nga një Departament i Fuqizuar i Drejtësisë i Shteteve të Bashkuara të Amerikës dhe një mori legjislacioni në pritje në SHBA dhe Evropë për të ulur komisionet e tij në aplikacione dhe për të bërë ndryshime të tjera.

“Ne besojmë se veprimi i qeverisë (përmes antitrustit, urdhrit ekzekutiv dhe legjislacionit) përfaqëson rrezikun më të madh për aksionet e Apple-it”, ka thënë Tom Forte, një analist në D.A. Davidson & Co, duke shtuar se ai shpresonte që drejtuesit e kompanisë të adresonin rreziqet në drejtim të fitimeve të saj.

Sipas të dhënave të IBES nga Refinitiv më 26 korrik, analistët presin që shitjet e shërbimeve të Apple-it të rriten me 24.1 për qind në 16.33 miliardë dollarë, çka përbën më shumë se një e pesta e shitjeve të saj të pritshme prej 73.30 miliardë dollarësh.

Vitin e kaluar, kur prodhuesi i lojës “Fortnite”, Epic Games, paditi Apple-in mbi komisionet e saj në App Store, analisti i Cowen & Co, Krish Sankar, vlerësoi se App Store-i siguron afro gjashtë për qind të të ardhurave të saj të përgjithshme dhe midis 10 për qind dhe 15 për qind të fitimeve të saj.

Mirëpo, kompania përballet edhe me rrezikun që Departamenti i Drejtësisë në SHBA mund të ndalojë Google-in të paguajë për të qenë motori i parazgjedhur i kërkimit në iPhone, ka thënë Angelo Zino i CFRA Research.

“Reuters” shkruan se zyrtarët e Departamentit të Drejtësisë kanë cituar vlerësime që Google-i i paguan Apple-it tetë deri në 12 miliardë dollarë në vit.

Megjithatë, analistët presin që kompania të shohë një bum në shitjet e iPhone-it për tremujorin e saj të tretë fiskal, me shitje të shtuara në 28,7 për qind në 34 miliardë dollarë, sipas të dhënave të Refinitiv që nga 26 korriku.

/Albanianpost.com


Lajmet kryesore