![](https://albanianpost.com/wp-content/uploads/2024/04/marko-arnautovic-inter-2023-2324-1693301053-115224.jpg)
Inter-i po mendon të shkurtojë periudhën e Marko Arnautovic-it me klubin duke i ndërprerë kontratën këtë verë.
Sipas një raporti nga “La Gazzetta dello Sport”, Inter-i do të shkurtojë kontratën e Arnautovic-it me klubin. Austriaku iu bashkua zikaltërve nga Bologna verën e kaluar.
Skuadra e Simone Inzaghi-t pagoi rreth 10 milionë euro për të sjellë 34-vjeçarin nga Bologna dhe nënshkroi një kontratë prej 3.5 milionë eurosh në vit për dy sezone.
Ideja e Inter-it ishte që të kishte një sulmues veteran rezervë pas lojtarëve si Lautaro Martinez dhe Marcus Thuram në skuadër.
Sidoqoftë, sezoni i Arnautovic ka qenë i rrënuar me dëmtime të shumta dhe paraqitje nën nivel sa herë që ai ka luajtur.
Kryesuesit e ligës pritet të diskutojnë një zgjidhje të mundshme për këtë çështje me përfaqësuesit e lojtarit në ditët në vijim dhe bisedimet parashikohen të çojnë në një lamtumirë të hershme për të.
Me Mehdi Taremi-n që do të mbërrijë këtë verë, Marko Arnautovic konsiderohet si tepricë dhe largimi i tij është opsioni i përshtatshëm për të dyja palët.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com